15 жніўня, ва ўрачыстасць Унебаўзяцця Найсвяцейшай Панны Марыі, якая з’яўляецца адпустовай у магілёўскай катэдры, вернікі на чале з Біскупскім вікарыем для горада Магілёва і Магілёўскай вобласці біскупам Аляксандрам Яшэўскім SDB будуць маліцца за Беларусь.
Цэлебрацыя ўрачыстай святой Імшы, падчас якой група магілёўскіх католікаў рознага ўзросту прыме з рук іерарха сакрамэнт канфірмацыі, распачнецца ў 18.30.
Біскуп Аляксандр Яшэўскі SDB просіць усіх католікаў горада на Дняпры і ваколіц сабрацца на Эўхарыстыі ў старажытнай магілёўскай катэдры Унебаўзяцця Найсвяцейшай Панны Марыі і святога Станіслава, каб разам прасіць Бога аб спыненні насілля, а таксама аб справядлівасці, міры і згодзе ў нашай краіне.
Пасля Імшы адбудзецца выстаўленне Найсвяцейшага Сакрамэнту, адарацыя і адмысловая малітва за Беларусь.
