Рэкалекцыі на пачатку новага навучальнага года – бясцэнны час, які дае кожнаму семінарысту магчымасць паразважаць над тым, што з’яўляецца ў яго жыцці найкаштоўнейшым скарбам.
Гэта асаблівы час ласкі, падчас якога семінарыст акунаецца ў атмасферу малітвы, цішыні і засяроджанасці, каб з новымі духоўнымі сіламі распачаць далейшую падрыхтоўку да святарства.
Духоўным кіраўніком рэкалекцый сёлета стаў а. Віталій Сярко SP. Падчас аскетычных канферэнцый рэкалекцыяніст спрабаваў прывіць будучым святарам любоў да святых, запаліць у сэрцах семінарыстаў прагненне наследаваць Хрыста па прыкладу благаслаўлёных.
Супольная Эўхарыстыя, адарацыя Найсвяцейшага Сакрамэнту, Крыжовы шлях, споведзь, індывідуальныя размовы з духоўным айцом – усё спрыяла таму, каб семінарысты засяродзіліся над глыбінёй сваіх адносінаў з Богам, без якіх немагчыма штодзённае жыццё сапраўднага вучня Хрыста.
Напрыканцы духоўных практыкаванняў семінарыйная супольнасць выказала ўдзячнасць айцу-рэкалекцыяністу за духоўны досвед, якім ён шчодра дзяліўся, і паабяцала рэалізаваць у сваім жыцці ўсе яго каштоўныя прапановы.
