Пошук


25.06.2019 14:17   Паводле: Grodnensis.by / Catholic.by

Фота: Кацярына Гардзеева, TUT.BY
Фота: Кацярына Гардзеева, TUT.BY

Ужо не першы год уліцы Іўя ва ўрачыстасць Божага Цела становяцца арт-пляцоўкай незвычайнай формы сакральнага мастацтва: прыгожых, але, на жаль, недаўгавечных дываноў з кветак.

Жыхары мястэчка каля традыцыйных чатырох алтароў, пры якіх робіць малітоўныя прыпынкі Эўхарыстычная працэсія, рассцілаюць не звычайныя дываны, а выкладаюць дзівоснай прыгажосці ўзоры і карціны з жывых кветак і пялёсткаў.

Стварэнне такіх незвычайных дэкарацый патрабуе шмат часу і працы. Перадусім ячшэ ўвесну трэба паклапаціцца пра тое, каб вырасціць неабходны жывы матэрыял. За некалькі дзён да ўрачыстасці адбываецца ўжо непасрэдная падрыхтоўка — збор кветак: і садовых, і палявых.

Як адзначаецца ў спецыяльным рэпартажы з урачыстасці Найсвяцейшага Цела і Крыві Хрыста ў Іўі на партале Grodnensis.by, у Іўі — горадзе, дзе жывуць прадстаўнікі чатырох веравызнанняў, — кветкамі дзеляцца не толькі католікі, але і прадстаўнікі іншых канфесій і рэлігій.

Працэсія Божага Цела становіцца тут агульнагарадскім святам, выразам адзінства ў разнастайнасці і сапраўднай беларускай талерантнасці, якая асаблівым чынам відаць у Іўі, дзе стагоддзямі ў міры і добрасуседстве жывуць хрысціяне, татары-мусульмане і юдэі.

Кветкі на ўрачыстасць у горад прывозілі таксама людзі з навакольных вёсак.

Для стварэння гэтай прыгажосці жыхары Іўя збіраліся напярэдадні працэсіі, каб будаваць часовыя алтары і разам упрыгожваць іх кветкамі. На світанні, а 5-й гадзіне раніцы, яны пачыналі складаць свае шэдэўральныя дэкарацыі на вуліцах горада.

На цэнтральнай плошчы ў Іўі, дзе ўстаноўлены помнік чатыром веравызнанням, вернікі зрабілі вялікі дыван з кветак, які нагадвае, што сёлета Каталіцкі Касцёл у Беларусі перажывае пастырскі Год сям’і як крыніцы радасці і надзеі моладзі. Таму элементам дэкарацый сталі словы заахвочвання быць сведкамі любові ў сем’ях.

На іншых дыванах былі адлюстраваныя эўхарыстычныя сімвалы і матывы. Стваральнікі дэкарацый такім чынам выражаюць сваю пашану да Найсвяцейшага Сакрамэнту.

Фота: Кацярына Гардзеева, TUT.BY
Фота: Кацярына Гардзеева, TUT.BY

Сёлетняя працэсія Божага Цела ў Іўі, як, зрэшты, і папярэднія, зноў трапіла ў аб’ектывы шматлікіх рэпарцёраў. Паколькі дываны з кветак і пялёсткаў пры ўсёй сваёй прыгажосці вельмі недаўгавечныя, іх імкнуцца зафіксаваць на здымках. Прапануем вашай увазе фотарэпартаж з Іўя, падрыхтаваны нашымі калегамі.

Абноўлена 25.06.2019 19:16
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Дух хоча жыць у нас –
мы пакліканы да вечнага жыцця