19 лютага Папа Францішак менаваў новым арцыбіскупам Мітрапалітам Каўнаскім Кястуціса Кеваласа, які да гэтага быў біскупам Цяльшайскім (Літва).
У афіцыйным паведамленні Святога Пасаду сказана, што Кястуціс Кевалас (Kestutis Kėvalas) нарадзіўся 17 лютага 1972 года ў Каўнасе.
Пасля заканчэння сярэдняй школы з 1990 па 1992 год навучаўся на факультэце радыёэлектронікі Каўнаскага тэхналагічнага ўніверсітэта.
У 1993 годзе паступіў у Каўнаскую вышэйшую духоўную семінарыю, дзе вывучаў філасофію і тэалогію да 1997 года, пасля чаго працягнуў вучобу ў семінарыі Найсвяцейшай Панны Марыі ў Балціморы ў Злучаных Штатах Амерыкі.
Завяршыўшы фармацыю і абараніўшы ліцэнцыят па тэалогіі, 29 чэрвеня 2000 года прыняў прэзбітэрскае пасвячэнне.
Быў прызначаны кіраўніком прапедэўтычнага (падрыхтоўчага) курсу ў Мітрапалітальнай семінарыі і адказным за душпастырства моладзі ў Каўнаскай архідыяцэзіі.
З 2002 года выкладаў маральную тэалогію на тэалагічным факультэце Каўнаскага ўніверсітэта імя Вітаўта Вялікага. 18 студзеня 2008 года ў гэтай навучальнай установе абараніў доктарскую дысертацыю па тэалогіі.
З чэрвеня 2005 па жнівень 2006 года быў духоўным айцом у Каўнаскай семінарыі, пасля чаго на працягу года працягваў навучанне ў Злучаных Штатах Амерыкі.
Вярнуўшыся на радзіму, з 2007 па 2012 год выконваў душпастырскія абавязкі пры каўнаскай катэдры і быў спаведніком у семінарыі. 8 лютага 2010 года быў прызначаны праграмным дырэктарам «Радыё Марыя» ў Літве.
27 верасня 2012 года быў менаваны дапаможным біскупам Каўнаскай архідыяцэзіі. Біскупскае пасвячэнне прыняў 24 лістапада 2012 года.
Прызначаны 20 красавіка 2017 года біскупам-каад’ютарам Цяльшайскай дыяцэзіі, 18 верасня таго ж года стаў біскупам Цяльшайскім.
Кафедра арцыбіскупа Каўнаскага заставалася вакантнай пасля таго, як 1 сакавіка мінулага года Папа Францішак прыняў просьбу аб адстаўцы ад пастырскага кіравання архідыяцэзіяй арцыбіскупа Лёнгінаса Вірбаласа. Былы арцыбіскуп Каўнаскі, які належаў да ордэна езуітаў, патлумачыў свой адыход праблемамі са здароўем і жаданнем больш прысвяціць сябе манаскаму жыццю ў Таварыстве Езуса.
