5 ліпеня папа Францішак ухваліў дэкрэты аб прызнанні гераічнасці цнотаў новых кандыдатаў да хвалы алтароў. Такім чынам адкрыта дарога да абвяшчэння іх святымі.
Дэкрэты датычацца італьянскіх свецкіх вернікаў Джорджо Ла-Піра, П’етро Дзі-Вітале і Карло Акуціса, а таксама іспанскай дзяўчынкі Алесіі Гансалес-Барас і Гансалес, якіх цяпер будуць называць Слугамі Божымі.
Джорджо Ла-Піра (1904–1977) вядомы ў Італіі як «святы мэр» Фларэнцыі. Кіраўніком гэтага горада ён быў у 1951–1957 гг. і ў 1961–1965 гг. На сваёй пасадзе Джоджо Ла-Піра выкарыстоўваў усе магчымасці для пераадолення сацыяльнай няроўнасці, выкаранення беднасці і спрыяння інтэгральнаму развіццю кожнай асобы.
Наступныя кандыдаты да хвалы алтароў пражылі нядоўгае, але святое жыццё.
Пьетро дзі Вітале (1916–1940) вучыўся ў дыяцэзіяльнай духоўнай семінарыі Палерма і шмат часу прысвячаў адарацыі Найсвяцейшага Сакрамэнту і ўшанаванню Беззаганнай Панны Марыі. Належаў да свецкага ордэна св. Францішка (тэрцыярыяў) і быў удзельнікам Руху свецкіх вернікаў «Каталіцкае дзеянне». П’етро заўчасна памёр ад цяжкай хваробы ва ўзросце 23-х гадоў.
Карло Акуціс (1991–2006) за сваё кароткае 15-гадовае жыццё стаў вядомым у свеце дзякуючы сваім надзвычайным здольнасцям у галіне інфарматыкі, якія ён выкарыстоўваў дзеля абвяшчэння Евангелля на прасторах Інтэрнэту і ў сацыяльных сетках.
Іспанская дзяўчынка Алесія Гансалес-Барас і Гансалес (1971–1985) адышла ў вечнасць у 14-гадовым узросце. Калі за год да смерці ў яе дыягнаставалі анкалагічнае захворванне, яна з поўнай пакорай прыняла волю Бога і ахвяравала свае пакуты за Каталіцкі Касцёл, за тагачаснага Папу Яна Паўла II і за іншых людзей. Памерла Алесія 5 снежня 1985 г.
