Перад агульнай аўдыенцыяй 11 красавіка на пляцоўцы перад Домам св. Марты Святы Айцец благаславіў электрабалід для аўтагонак «Формулы Е». Пры гэтым прысутнічалі стваральнікі аўто і арганізатары чэмпіянату.
«Формула E» — клас аўтагонак на электрамабілях, заснаваны ў 2012 г. і санкцыянаваны міжнароднай аўтамабільнай федэрацыяй FIA. Мэтай стала імкненне стварыць лабараторыю для даследаванняў і распрацоўкі электрычных транспартных сродкаў, а таксама іх папулярызацыя.
Святы Пасад даўно ставіць на электрамабілі.
У ватыканскім гаражы шмат машын з электрычным прывадам. Так, некалькі месяцаў таму General Motors падаравала Пантыфіку тры такіх аўтамабілі. Раней, у свой 80-ы дзень нараджэння ў снежні 2016 г. папа Францішак атрымаў у падарунак ад адной берлінскай кампаніі электрычны Nissan, а ў Год Міласэрнасці нямецкі канцэрн BMW перадаў Святому Пасаду некалькі сваіх электракараў.
Варта нагадаць, што падчас пантыфікату Бэнэдыкта XVI на электрамабілі пераселі ватыканскія службы парадку.
