У межах падрыхтоўкі да XV Генеральнай Асамблеі Сінода Біскупаў, запланаванай на кастрычнік 2018 г. на тэму «Моладзь, вера і распазнанне паклікання», Генеральны сакратарыят Сінода арганізуе міжнародны семінар, прысвечаны праблемам моладзі. Пройдзе ён 11–15 верасня ў курыі Ордэна езуітаў у Рыме.
У пасяджэннях прымуць удзел эксперты з пяці кантынентаў, а таксама юнакі і дзяўчаты з розных грамадска-культурных і рэлігійных кантэкстаў. У праграме форума прадугледжаны выступленні прадстаўнікоў акадэмічнага свету, сведчанні, дыскусіі і абмеркаванні ў моўных групах. Асноўнымі тэмамі будуць: моладзь і тоеснасць, моладзь і адметнасці, моладзь і перспектывы, моладзь і тэхналогіі, моладзь і трасцэндэнтнасць.
Пра сваё рашэнне правесці ў кастрычніку 2018 г. Сінод Біскупаў, прысвечаны моладзі, папа Францішак заявіў 6 кастрычніка 2016 г. Яно было прынята пасля кансультацый з біскупскімі канферэнцыямі, Усходнімі Каталіцкімі Цэрквамі і канферэнцыямі генеральных настаяцеляў манаскіх кангрэгацый.
Папа заклікаў маладых людзей прыняць актыўны ўдзел у «сінадальным падарожжы», бо ўвесь Касцёл жадае пачуць і адчуць іх голас і веру, а таксама іх сумневы і крытычныя заўвагі. Для такой зваротнай сувязі быў распрацаваны адмысловы інтэрактыўны апытальнік. Адказы на змешчаныя ў ім пытанні можна даслаць у сакратарыят Сінода Біскупаў не пазней 30 лістапада 2017 г.
