14 кастрычніка Папа Францішак прызначыў новую намесніцу сакратара Адміністрацыі маёмасці Апостальскай Сталіцы (APSA).
Як паведаміла Беларуская рэдакцыя парталу Vatican News, падсакратаром Адміністрацыі маёмасці стала італьянская законніца, сястра Сільвана Піра.
Яна нарадзілася 6 лістапада 1972 года ў Торэ-дэль-Грэка, побач з Неапалем. Пасля атрымання дыплому па спецыяльнасці эканоміка бізнесу ў Пізанскім універсітэце і ступені магістра ў галіне інавацыйнага мэнаджмэнту ў Вышэйшай школе святой Ганны ў Пізе, вывучала тэалогію ў Папскім салезіянскім універсітэце ў Рыме. 7 снежня 2009 года дала вечныя манаскія абяцанні ў кангрэгацыі Сясцёр Францішканак Місіянерак ад Дзіцяткі Езуса.
З 2008 па 2012 год супрацоўнічала са службай душпастырства моладзі архідыяцэзіі Перуджа-Чыта-дэлла-П’евэ. З 2012 года была Генеральным эканомам сваёй манаскай супольнасці.
Сястра Сільвана замяніла на пасадзе італьянскага салезіяніна, ксяндза Джардано Пічыноці.
2 кастрычніка бягучага года Папа Францішак прызначыў ксяндза Джардано старшынёй гэтай структуры.
