Папа Францішак падзякаваў пажылым і хворым італьянскім святарам за сведчанне вернай любові да Бога і Касцёла, заклікаў іх не баяцца пакутаў, якія вядуць да святасці жыцця.
Як паведамляе беларуская рэдакцыя парталу Vatican News, 17 верасня Пантыфік скіраваў пасланне з нагоды Дня малітвы і братэрства з пажылымі і хворымі святарамі ў італьянскай Ламбардыі. Ініцыятыва праводзіцца ў Касцёле на поўначы Італіі з 2014 г. Яе галоўныя набажэнствы праходзяць у санктуарыі Маці Божай з Караваджа пры ўдзеле біскупаў і духавенства рэгіёна.
Святы Айцец высока ацаніў увагу пастыраў да самай уразлівай часткі прэзбітэрату.
Пажылыя і хворыя святары, паводле Папы, здзяйсняюць важнае служэнне ў Касцёле праз сваю малітву, уменне слухаць, ахвяраванне пакутаў.
«Дзякуй за сведчанне вернай любові да Бога і Касцёла. Дзякуй за маўклівае абвяшчэнне Евангелля жыцця. Дзякуй за тое, што з’яўляецеся жывой памяццю, да якой неабходна звяртацца, каб будаваць заўтрашні дзень Касцёла», — напісаў ён.
Пантыфік спаслаўся на цяжкасці, выкліканыя пандэміяй і звязаныя з доўгім знаходжаннем у замкнёнай прасторы, страхам заражэння, усведамленнем уласнай неабароненасці. Папа выказаў спадзяванне, што гэты перыяд навучыць цаніць час, падораны нам, адчуваць смак сустрэчы з іншымі людзьмі; дапаможа аздаравіцца ад вірусу самадастатковасці. «Не забудзем гэты ўрок!» — заклікаў пастыр паўсюднага Касцёла.
Ён падкрэсліў, што пакуты ў жыцці святара, калі перажываюцца з позіркам, скіраваным да Бога, могуць служыць духоўнаму ачышчэнню і асвячэнню.
«Не будзем баяцца пакутаў: Пан нясе крыж разам з намі»,— запэўніў Святы Айцец.
