У суботу 30 мая ў Ватыканскіх садах Святы Айцец Францішак узначаліць малітву Ружанца. Дзякуючы прамой трансляцыі ватыканскіх СМІ будзе створаны тэлемост з Марыйнымі санктуарыямі ва ўсім свеце.
Як паведамляе беларуская рэдакцыя парталу Vatican News, набажэнства арганізуе Папская рада па новай евангелізацыі. Падчас яго будзе ўсталявана сувязь з найбуйнейшымі санктуарыямі: у Еўропе — з французскім Люрдам, партугальскай Фацімай, італьянскімі Сан-Джаванні Ратонда і Пампеямі, польскай Чэнстаховай; у Злучаных Штатах — з Вашынгтонам; у Афрыцы — з нігерыйскім Элеле і Ямусукра ў Кот-д’Івуары; у Лацінскай Амерыцы — з мексіканскім Гвадэлупэ, калумбійскім Чыкінкіра і Луханам і Мілагра ў Аргентыне.
Асобнымі дзясяткамі Ружанца, па інфармацыі Папскай рады па новай евангелізацыі, будуць маліцца прадстаўнікі розных груп, якія асабліва пацярпелі ад каранавірусу.
Гэта ўрач і медсястра; вылечаны і той, хто страціў члена сям’і; святар, шпітальны капелан і законніца; фармацэўт і журналіст; валанцёр грамадзянскай абароны са сваёй сям’ёй; маладая сям’я, у якой нарадзілася ў гэты час дзіця — знак надзеі і перамогі жыцця над смерцю.
Традыцыю завяршаць май ружанцовай малітвай ля Люрдскага грота, размешчанага ў Ватыканскіх садах, увёў у 1979 годзе святы Ян Павел ІІ.
