Памятны медаль сёмага года пантыфікату папы Францішка прысвечаны Спецыяльнай Асамблеі Сінода Біскупаў па Панамазонскім рэгіёне. Нарада пройдзе ў кастрычніку ў Ватыкане.
Як паведамляе беларуская рэдакцыя парталу Vatican News, на аверсным баку медаля змешчана выява гербу Святога Айца і надпіс на лаціне: Franciscus P.M. A.VII — «Францішак Н. (Найвышэйшы) П. (Пантыфік) Г. (Год) VІІ».
На рэверсе адлюстравана місійная дзейнасць Касцёла ў Панамазонскім рэгіёне.
Тут знаходзяцца выявы прадстаўнікоў карэнных народаў, мясцовай флоры.
На пярэднім плане відаць рукі, якія ўдзяляюць сакрамэнт хросту і Эўхарыстыі. У верхняй частцы змешчана выява голуба — сімвал Святога Духа, здольнага ствараць адзінства ў разнастайнасці, а таксама радок з Кнігі Быцця на лаціне: Et vidit Deus quod esset bonum — «І ўбачыў Бог, што гэта добра».
Аўтарам медаля з’яўляецца італьянская мастачка Арыета Росі, якая на працягу многіх гадоў супрацоўнічае з Ватыканам.
Калекцыянеры могуць набыць памятны медаль пачынаючы з 12 жніўня ў сядзібе Адміністрацыі маёмасці Святога Пасаду, у крамах Ватыканскага выдавецтва і Ватыканскага філатэлістычна-нумізматычнага аддзелу.
