4 чэрвеня ў Непакалянаве (Польшча) на 94-м годзе жыцця адышоў у вечнасць а. Томаш Лях OFMConv, які 15 гадоў служыў на Беларусі.
Айцец Томаш нарадзіўся 9 жніўня 1925 года ў Стэнжыцы (Польшча). У 1945 годзе распачаў навіцыят у правінцыі Маці Божай Беззаганнай Ордэна Братоў Меншых Канвентуальных (францішканаў).
Свой зямны шлях ён завяршыў на 73-м годзе законнага і 66-м годзе святарскага жыцця.
З 1990 да 2005 года быў пробашчам у парафіі св. Юзафа ў Валожыне.
Менавіта дзякуючы яго руплівасці намаганнямі мясцовых вернікаў касцёл у Валожыне, у якім у савецкія часы размяшчалася фабрыка, быў адрамантаваны і зноў стаў месцам культу.
Пахаванне адбудзецца 6 чэрвеня а 11-й гадзіне ў непакалянаўскай базыліцы. Малітва пры спачылым распачнецца а 10-й гадзіне ў санктуарыі св. Максімільяна Кольбэ ў Непакалянаве.
