Напярэдадні ўрачыстасці Нараджэння Пана дырэктар «Радыё Марыя» і партала Catholic.by кс. Аляксандр Улас скіраваў сваё святочнае віншаванне слухачам і чытачам.
Бог прыходзіць на зямлю і аб’яўляе сябе людзям не як Вялікі і Усемагутны, а як малое Немаўлятка, якое ў цішыні бэтлеемскай ночы ўваходзіць у гісторыю чалавецтва.
З гэтага моманту сусвет цалкам змяняе кірунак развіцця. Тое, што на працягу стагоддзяў усё далей адыходзіла ад свайго Стварыцеля, зноў наблізілася да Яго праз Яго ўласнае Уцелаўленне і Нараджэнне.
Стварыцель сам прыйшоў да тых, каго стварыў.
Набліжаючыся да кожнага з нас, Езус Хрыстус прагне ўвайсці ў жыццё кожнага чалавека, каб адарыць яго найбольшым дарам, які Бог можа ахвяраваць нам — Сябе самога. З усімі ўласцівасцямі, якія Ён мае: Любоў, Супакой, Дабро, Міласэрнасць, Радасць, Вечнасць, Усемагутнасць.
Жадаем, каб кожны ў сваёй штодзённасці змог адкрыць сваё сэрца, душу і жыццё маленькаму Немаўляці — Вялікаму Богу — Езусу Хрысту. Каб Слова, якое сталася целам, мела магчымасць таксама пасяліцца і між намі, адорваючы праз нас кожнага чалавека сваім Супакоем і Дабром!
Божага благаслаўлення, супакою сэрца і апекі Найсвяцейшай Панны Марыі і святога Юзафа ўсім вам жадаюць рэдакцыя «Радыё Марыя» і Catholic.by
Дырэктар кс. Аляксандр Улас
