8–9 лістапада ў Міждыяцэзіяльнай вышэйшай духоўнай семінарыі ў Гродне адбыўся дзень засяроджання — асаблівы час роздуму над сваім пакліканнем і сустрэчы з жывым Хрыстом.
Традыцыйна дзень засяроджання распачаўся гімнам да Святога Духа «Veni Creator Spiritus» і Камплетай, падчас якой духоўны кіраўнік кс. Павел Беланос, пробашч парафіі Узвышэння Святога Крыжа ў Макараўцах, звярнуўся да семінарыстаў са словамі: «Чарговы дзень засяроджання — чарговая магчымасць навяртання».
Святар закрануў тэму Божай міласэрнасці і няспыннага прабывання ў стане асвячальнай ласкі, разважаючы над прыпавесцю пра марнатраўнага сына. «Мы павінны ісці да споведзі не столькі каб атрымаць адпушчэнне грахоў, а каб вярнуць сабе годнасць быць дзіцём Бога», — падсумаваў святар. Асобную ўвагу ён прысвяціў разважанню над пакліканнем да святарства і крызісамі, якія можна напаткаць на гэтым шляху.
Семінарысты мелі магчымасць паразважаць над пачутым у цішыні падчас адарацыі Найсвяцейшага Сакрамэнту, паразмаўляць з Богам у індывідуальнай малітве і прыступіць да сакрамэнту паяднання.
Кульмінацыяй стала святая Імша — сустрэча з Эўхарыстычным Хрыстом, — да якой супольнасць семінарыі рыхтавалася ўвесь дзень.
У гаміліі кс. Павел Беланос нагадаў пра Хрыста, які кліча нас да святасці, у «новы Ерузалем», а таксама заахвоціў не адкладаць працу над сваім жыццём на пазней, а змяняць яго адразу з дапамогай Усемагутнага Бога. Напрыканцы Эўхарыстыі святар пажадаў семінарыстам поспехаў ва ўзбіранні на «сваю гару Табор», дзе мы сустракаемся з Езусам Хрыстом.
