Пошук

17.07.2018 10:58   Паводле: Зміцер Лупач / catholicnews.by / Catholic.by

15 ліпеня падчас візітацыі біскупа Віцебскага Алега Буткевіча ў парафію Божай Міласэрнасці ў Пагошчы (Відзаўскі дэканат) тут адбылося асвячэнне касцёла.

Спачатку іерарх благаславіў новы крыж у цэнтры вёскі, а потым урачыстая працэсія скіравалася да касцёла. Хоць у святыні ўжо сямнаццаць гадоў моляцца вернікі, да гэтага часу не адбылося яго асвячэння.

На пачатку ўрачыстай св. Імшы іерарх падзякаваў святарам, якія раней служылі ў Пагошчы, асабліва першаму мясцоваму пробашчу кс. Кшыштафу Мянкіну, які самаахвярна будаваў святыню і супольнасць вернікаў у Пагошчы, а таксама кс. Эдварду Ахрамовічу. Словы падзякі ад біскупа прагучалі і ў адрас цяперашняга пробашча кс. Славаміра Самковіча, які служыць тут з 2015 года і паспеў шмат зрабіць у справе як матэрыяльнага добраўпарадкавання святыні, так і духоўнага развіцця парафіі.

Біскуп Алег асаблівым чынам адзначыў унёсак у з’яўленне і ўтрымання касцёла ў Пагошчы кіраўніка мясцовай гаспадаркі Рамуальда Шукеля. Пры гэтым іерарх падкрэсліў: «Вельмі добра тое, што святыня сёння не пустуе».

У сваёй гаміліі пастыр Віцебскай дыяцэзіі ўзгадаў словы Езуса Хрыста, якія Ён сказаў Пятру: «На табе збудую свой Касцёл, і брамы пякельныя не перамогуць яго», разважаючы на тэму нашай ахвяры Богу. Кожная сумленна выкананая праца, па словах біскупа, і ёсць гэтай ахвярай.

Асвячэнне касцёла святым алеем здзейснілі біскуп Алег Буткевіч і кс. Эдвард Ахрамовіч. Напрыканцы Імшы быў падпісаны біскупскі дэкрэт аб асвячэнні касцёла Божай Міласэрнасці ў Пагошчы.

Свае подпісы пад дакументам паставілі біскуп Алег Буткевіч, ксёндз Эдвард Ахрамовіч, ксёндз Славамір Самковіч і Рамуальд Шукель. Апошні быў асабліва ўзрушаны такім гонарам і сказаў, што гэта стала адной з самых важных падзеяў у ягоным жыцці.

Фотарэпартаж з асвячэння касцёла ў Пагошчы >>>

Абноўлена 18.07.2018 01:43
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.