Пошук


04.06.2018 12:57   Catholic.by

3 чэрвеня католікі Магілёва далі сведчанне сваёй веры ў жывую і рэальную прысутнасць Езуса Хрыста ў Найсвяцейшым Сакрамэнце.

Вернікі ўсіх чатырох парафій горада на Дняпры са сваімі душпастырамі прынялі ўдзел у св. Імшы, якая адбылася ў катэдральнай парафіі Унебаўзяцця Найсвяцейшай Панны Марыі і св. Станіслава. Цэлебрацыю Эўхарыстыі ўзначаліў біскуп Аляксандр Яшэўскі SDB, біскупскі вікарый для г. Магілёва і Магілёўскай вобласці.

Падчас Імшы іерарх маліўся ў інтэнцыі адраджэння веры на магілёўскай зямлі, аб глыбокім жыцці Эўхарыстыяй для кожнага верніка, аб тым, каб было дастаткова служыцеляў Ахвяры Хрыста, якія будуць здзяйсняць яе на алтарах нашай Бацькаўшчыны, а асабліва на ўсходніх яе тэрыторыях.

      

У сваёй гаміліі біскуп адзначыў што ў гэтую ўрачыстасць Хрыстус, які прысутнічае ў Эўхарыстыі, выходзіць са святыняў, каб быць праслаўленым і па-за іх сценамі.

«Працэсія нагадвае нам, што там, куды мы нясем Найсвяцейшы Сакрамэнт, павінна быць месца для Езуса.

Гэта значыць у нашым жыцці, сярод тых справаў і клопатаў, з якімі мы сутыкаемся кожны дзень. Езус хоча быць на нашых вуліцах і ў нашых дамах. Усюды! Ён хоча быць усюды і праз сапраўднае сведчанне нашага хрысціянскага жыцця», — падкрэсліў біскуп Аляксандр.

Ён таксама выказаў пажаданне, каб удзел у св. Імшы перамяняў вернікаў у маленькія гостыі, якія злучаюцца з вялікай Гостыяй — Хрыстом.

«Мы ўсе павінны стаць гостыяй для іншых, гостыяй у школе, на працы, у інстытутах, сем’ях. Мы павінны стаць гостыяй, якую можна ўзяць у рукі, паламаць і раздаць, каб іншыя, спажыўшы яе, атрымалі духоўныя сілы», — заахвоціў вернікаў іерарх.

Вікарый Магілёўскага рэгіёна на заканчэнне гаміліі дадаў:

«Жывы, сапраўдны Бог Езус Хрыстус чакае кожнага ў Найсвяцейшай Эўхарыстыі. Ён заўсёды гатовы дапамагчы пажылому чалавеку, алкаголіку, наркаману, беспрацоўнаму, бацьку і маці, дзіцяці, хлопцу і дзяўчыне, Папу і біскупу, святару і законніцы — кожнаму, хто папросіць Яго аб дапамозе».

Пасля Імшы адбылася святочная эўхарыстычная працэсія, якая прайшла па вуліцах Магілёва. Вялікая колькасць вернікаў разам з духавенствам і кансэкраванымі асобамі прайшлі за Езусам у Эўхарыстыі ад галоўнай каталіцкай святыні Магілёва да старажытных каталіцкіх могілак, на якіх знаходзіцца капліца святога Антонія.

Пры кожным з чатырох алтароў святары разважалі пра боскія цноты — веру, надзею і любоў, — а таксама пра дар паклікання. Менавіта гэтыя тэмы сталі лейтматывам сёлетняй урачыстасці Божага Цела ў Магілёве.

Каля першага алтара, які будавалі і ўпрыгожвалі вернікі катэдральнай парафіі, кс. пробашч Віталій Маргуноў у гаміліі раскрыў сутнасць цноты веры як адказу чалавека Богу, які адкрывае і аддае яму, чалавеку, самога сябе.

Парафія св. Антонія Падуанскага, у якой нясуць служэнне айцы кларэціны, падрыхтавала другі алтар. У разважанні пры гэтым прыпынку а. Віталь Чабатар нагадаў, што паратункам ад нядолі, нястачы, няўпэўненасці ў заўтрашнім дні з’яўляецца Езус Хрыстус.

Айцец Раман Шульц OP каля трэцяга алтара, падрыхтаванага вернікамі парафіі св. Ядвігі і св. Казіміра, разважаў пра боскую цноту любові, а пры чацвёртым алтары кс. Юзаф Сярпейка распавёў пра хрысціянскае пакліканне.

На заканчэнне ўрачыстасці біскуп Аляксандр Яшэўскі падзякаваў усім яе ўдзельнікам за прысутнасць і дапамогу ў яе падрыхтоўцы і правядзенні.

Абноўлена 04.06.2018 15:01
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.