Сёлета адпустовыя ўрачыстасці ў беларускай парафіі Св. Барталамея ў Вільні адбыліся 20 жніўня. Святую Імшу з гэтай нагоды ўзначаліў дапаможны біскуп Мінска-Магілёўскай архідыяцэзіі Аляксандр Яшэўскі SDB.
Касцёл св. Барталамея ў Вільні перададзены беларускай супольнасці і набажэнствы ў ім адбываюцца толькі па-беларуску. Адміністратар парафіі — айцец Арыюш Малыска OFM Cap, які ўжо паўтара года апякуецца беларусамі-католікамі ў Літве.
На фэст св. Барталамея прыехалі таксама вернікі з Мінска і Маладзечна. Падчас святой Імшы спяваў гурт рэлігійнай музыкі Laudans, які пасля заканчэння Эўхарыстыі даў канцэрт беларускіх рэлігійных спеваў.
Таксама ў гэтыя дні на тэрыторыі касцёла працавала фотавыстава Віктара Ведзеня «Дарогі, якімі мы Бога шукаем».
Беларусы Вільні, парафіяне касцёла св. Барталамея, выказваючы падзяку біскупу Аляксандру за ўдзел у парафіяльных урачыстасцях, падкрэслілі, што для іх вельмі важная прысутнасць беларускіх іерархаў і іншых святароў, бо такія моманты дапамагаюць адчуваць повязь з бацькаўшчынай і захоўваць беларускую тоеснасць.
