9 – 10 чэрвеня адбыўся першы візіт Апостальскага Нунцыя арцыбіскупа Габара Пінтэра ў Пінскую дыяцэзію. Распачалася візітацыя з наведвання Міждыяцэзіяльнай духоўнай семінарыі імя Тамаша Аквінскага ў Пінску, дзе іерарх сустрэўся з семінарыстамі і іх выкладчыкамі.
![](/3/../2/images/phocagallery/2017/06/2017-06-12-vizit/thumbs/phoca_thumb_l_vizit-007.jpg)
«Малітва, навука, братэрства, а таксама апостальскае жыццё — вось тыя чатыры калоны, на якіх павінна будавацца фармацыя ў кожнай семінарыі, — зазначыў арцыбіскуп. — Гэтыя чатыры калоны — чатыры вымярэнні — ўзаемадзейнічаюць паміж сабой і па іх павінна жыць кожная семінарыя», — дадаў Апостальскі Нунцый.
![](/3/../2/images/phocagallery/2017/06/2017-06-12-vizit/thumbs/phoca_thumb_l_vizit-005.jpg)
10 чэрвеня іерарх сустрэўся з духавенствам і кансэкраванымі асобамі Пінскай дыяцэзіі. Падчас сустрэчы святары і прадстаўнікі манаскіх супольнасцей распавялі пра сваё жыццё і служэнне.
«Я прыехаў, каб бліжэй з вамі пазнаёміцца, каб мець магчымасць раздзяліць вашы радасці і клопаты, каб проста пабыць сярод вас», — адзначыў нунцый.
Апостальскі Нунцый выразіў глыбокае прызнанне і захапленне руплівасцю і ахвярнасцю душпастыраў, якія ў няпростых умовах адраджэння веры пасля часоў атэізму служаць адначасова ў некалькіх парафіях, бо ўсцяж не хапае святароў.
![](/3/../2/images/phocagallery/2017/06/2017-06-12-vizit/thumbs/phoca_thumb_l_vizit-008.jpg)
Іерарх звярнуў увагу на місійнасці служэння духоўных асобаў: «Большасць з вас спаўняе сваё служэнне ва ўмовах сапраўднай місіі. Для нас, духоўных асобаў, існуе вялікая рызыка засяродзіцца на нашым пастырскім служэнні, забываючы аб тым, што мы — місіянеры Хрыста, і ў першую чаргу кожны з нас пакліканы быць Яго вучнем».
![](/3/../2/images/phocagallery/2017/06/2017-06-12-vizit/thumbs/phoca_thumb_l_vizit-011.jpg)
У той жа дзень нунцый удзяліў прэзбітэрскае пасвячэнне дыякану Антону Анціпенку, а таксама наведаў парафію Св. Бэнэдыкта ў Пінску, а таксама Лагішынскі Дом Міласэрнасці для пажылых і адзінокіх асобаў.
На завяршэнне візіту нунцый узнёс да Бога малітву падзякі і праслаўлення перад абразом Маці Божай Лагішынскай, Каралевы Палесся, Апякункі Пінскай дыяцэзіі.