Паведамленне на польскай мове >>>
Свята Божай Сям’і ўказвае, якою важнаю з’яўляецца сям’я для кожнага
чалавека. У ёй пачынаецца жыццё і там яно знаходзіць адпаведныя ўмовы
для развіцця. Гэта магчыма дзякуючы безумоўнай сужэнскай і бацькоўскай
любові. Там, дзе не хапае любові, жыццё знаходзіцца пад пагрозай,
асабліва жыццё самых слабых і безабаронных.
Ведаючы пра гэта, многія з вас паспяшылі на паратунак да жыцця, якому пагражала небяспека, узяўшы на сябе абавязак «Духоўнага ўсынаўлення». На працягу дзевяці месяцаў вы маліліся за зачатае дзіця, якому пагражаў аборт, а значыць — смерць. Вы прасілі аб уратаванні жыцця, каб дзіця, якое ўжо існуе, магло нарадзіцца.
Дзякуем усім, хто ўзяў на сябе абавязак штодзённай малітвы, адрачэнняў і добрых учынкаў у часе трывання так званага «Духоўнага ўсынаўлення». Многія з вас ужо не першы год спаўняюць адзін з самых важных учынкаў міласэрнасці, якім з’яўляецца абарона жыцця найслабейшых. Цэнім тое, што вы чыніце для зачатых дзяцей, штодзень становячыся перад Богам і просячы, каб змяніўся настрой у сэрцах бацькоў, каб яны адкрыліся на жыццё. Заахвочваем вас чыніць гэта і надалей.
Аказваючы любоў і міласэрнасць патрабуючым, вы становіцеся сапраўднымі вучнямі Хрыста. І на гэты шлях узрастання ў любові ад сэрца вам благаслаўляем
Каталіцкія Біскупы ў Беларусі
Свята Святой Сям’і 2016
