23 кастрычніка навучэнцы першага курсу Міждыяцэзіяльнай вышэйшай духоўнай семінарыі ў Пінску накіраваліся ў Лагішын, каб заверыць свае пакліканні перад абразом Маці Божай Лагішынскай, Каралевы Палесся.
Разам з першакурснікамі ўпершыню свае абавязкі заверыў Маці Божай віцэ-рэктар кс. Адам Дынак, які ў гэтым годзе распачаў працу ў Пінску.
У прамове перад семінарыстымі пробашч лагішынскай парафіі ксёндз Тадэвуш Шэшка адзначыў, што адносіны з Паннай Марыяй і Яе любоў да сваіх дзяцей патрабуюць шчырасці. «Бо сваю Маці немагчыма падмануць», – падкрэсліў святар.
Пасля ўрачыстай святой Імшы семінарысты заверылі свае пакліканні перад цудадзейным абразом Багародзіцы. «Сёння мы, алюмны Вышэйшай духоўнай семінарыі ў Пінску, якіх Твой Сын Езус Хрыстус паклікаў на шлях свайго святарства, прыходзім да Цябе і аддаёмся цалкам Тваёй матчынай апецы», – гэтымі словамі семінарысты пачалі малітву перад Каралевай Палесся.
Кожны першакурснік атрымаў у падарунак абраз Маці Божай Лагішынскай. Пасля набажэнства госці накіраваліся ў Лагішынскі дом міласэрнасці.
