8 кастрычніка брэсцкая супольнасць Кангрэгацыі Сясцёр Кармэлітак Дзіцяткі Езуса адзначыла 25-гадовы юбілей малітвы і працы.
Урачыстую святую Імшу ўзначаліў дапаможны біскуп Пінскай дыяцэзіі Казімір Велікаселец. Разам з сёстрамі ўзносілі падзяку Богу парафіяне і шматлікія дзеці з катэхетычных заняткаў. Удзельнічалі сёстры з Польшчы і Беларусі, а таксама святары з дэканату і айцы кармэліты.
У гаміліі біскуп адзначыў уклад сясцёр у адраджэнне Каталіцкага Касцёла ў Беларусі і падзякаваў за адданую працу.
Упрыгожыў урачыстасць спевамі на словы св. Тэрэзы ад Дзіцяткі Езуса хор з кармэлітанскай парафіі Мінска. Таксама прагучаў спеў на словы св. Яна ад Крыжа ў выкананні духоўнай выхаванкі сясцёр.
Прысутныя маглі бліжэй пазнаёміцца з дзейнасцю супольнасці кармэлітак праз спецыяльна падрыхтаваную з гэтай нагоды прэзентацыю.
Пасля заканчэння літургічнай часткі святкаванне перанеслася ў кляштар супольнасці, дзе адбыўся абед і працягвалася дзяленне ўражаннямі, радасцю і ўспамінамі паміж сёстрамі, якія калісьці працавалі ў гэтым месцы, і парафіянамі, якія дапамагалі ў адраджэнні святыні і парафіяльнага жыцця ў Брэсце. Манахіні атрымалі благаслаўленне біскупа і падзякавалі Богу і ўсім прысутным за гэты прыгожы юбілей на брэсцкай зямлі, сведкамі і ўдзельнікамі якога яны сталі.
