Пошук


27.07.2016 00:00  

24 ліпеня ў парафіі Св. Ганны ў в. Крыўчыцы (Пінская дыяцэзія) адбылася адпустовая ўрачыстасць. Яе ўзначаліў біскуп Пінскі Антоні Дзям’янка.

Звяртаючыся да вернікаў, біскуп адзначыў падчас Імшы, што ў гэтым годзе на парафіяльнай урачыстасці святой Ганны яны збіраюцца ў адноўленай капліцы, таму гэтая сустрэча мае двайную радасць і сямейны характар. «Тут сабралася парафіяльная сям’я, якая з’яўляецца часткай дыяцэзіяльнай пінскай сям’і і часткай Паўсюднага Касцёла, — сказаў іерарх. — Другое вымярэнне нашай сустрэчы — Святая Сям’я ў шырокім значэнні: не толькі Езус, Марыя і Юзаф, але і бацькі Марыі — святыя Яўхім і Ганна».



Такім чынам, адзначыў пінскі ардынарый, па лініі Маці Езуса гэта звычайная сям’я, умяшальніцтва ж Бога бачна па лініі бацькі — «бо ім з’яўляецца толькі і выключна Бог». «У рэчаіснасці прыйсця Збаўцы ў гэты свет, Яго дзяцінства і ўзрастання сустрэліся выключным чынам чалавечае і звышпрыроднае, Божае», — сказаў біскуп.

Адначасова, як дадаў іерарх, «чалавечае ад пачатку сямейнай традыцыі было дапоўнена Божай прысутнасцю»: «толькі будучы выхаванай у такой атмасферы, Марыя была здольнай падчас Звеставання сказаць Богу: “Няхай станецца паводле Твайго слова”». У гэтым, адзначыў біскуп, вялікая роля святых Яўхіма і Ганны.



«Мы сёння таксама просім, каб і ў нашай рэальнасці перапляталася Божае і чалавечае, — сказаў пінскі ардынарый. — Больш за тое, каб Божае надавала сэнс чалавечаму існаванню».

Узгадаўшы выпадак, апісаны ў Евангеллі, калі бацькі шукалі 12-гадовага Езуса ў святыні, біскуп звярнуў увагу на тое, што кажа пра гэта евангеліст: Марыя захавала ў памяці і разважала ў сэрцы над гэтымі здарэннямі. «І гэта менавіта вынік выхавання ў бацькоўскім доме: Яна не разумела, але захоўвала ў памяці і разважала ў сваім сэрцы, — патлумачыў іерарх. — Дастаткова было ведаць, што Бог — гэта любоў і што Ён жадае чалавеку найлепшага». «Памятаць і разважаць — значыць пастаянна шукаць адказ на пытанне, як Богу адказваць на Яго любоў», — сказаў біскуп і выказаў меркаванне, што гэта заданне для хрысціянскай сям’і і на сённяшні час.



Пінскі ардынарый пажадаў, каб «памятаць, разважаць, маліцца і жыць у адкрытасці на натхненні, паходзячыя ад Бога» было заданнем для сем’яў парафіі ў Крыўчыцах і для дыяцэзіяльнай супольнасці.

(AG)

Фота Уладзіслава Козела

Абноўлена 05.06.2017 13:39
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця