Пошук


08.11.2016 10:58  

У Рыме завяршылася Трэцяя сусветная сустрэча народных рухаў, у якой прымаў удзел біскуп Пінскі Антоні Дзям’янка. Міжнародны форум завяршыўся напярэданні аўдыенцыяй у Ватыкане.

«Тэмы, узнятыя на гэтым форуме, датычылі адказнасці за зямлю, прыродныя рэсурсы, жыццё чалавека, яго свабоду, — расказаў у каментарыі беларускай рэдакцыі Ватыканскага радыё біскуп Пінскі Антоні Дзям’янка. — Пытанні, якія ўздымалі прадстаўнікі розных кантынентаў, гэта свабода сумлення, веравызнання, захавання народных звычаяў, а таксама адказнае выкарыстанне прыродных рэсурсаў і справядлівы падзел прыродных багаццяў», — пералічыў беларускі іерарх.

У сустрэчы прынялі ўдзел каля 170 чалавек з 65 краін свету. Асаблівае месца займалі дыскусіі прадстаўнікоў Афрыкі і Паўднёвай Амерыкі, бо вышэйпералічаныя пытанні, а дадаткова да іх і праблема існаваяння мафіёзных структур, вельмі актуальныя і нават балючыя для гэтых рэгіёнаў.

Тэмы, якія ўздымаліся на форуме, біскуп Пінскі суаднёс і з беларускай рэальнасцю.

«Будучы на сустрэчы я падумаў, што наша зямля, наша краіна ў мінулым таксама перажывала войны. Вялікая тэхнагенная катастрофа — аварыя на Чарнобыльскай АЭС, з якой была звязана маштабная праграма перасялення з забруджаных тэрыторый. І тут прыходзяць думкі пра адказнасць за чалавечае жыццё ад зачацця да натуральнай смерці, а таксама пра патрэбу асцярожнага, узважанага падыходу да новых тэхналогій, якія ў многім аблягчаюць жыццё, але пры неадказным падыходзе могуць прывесці да рознага роду трагедый», — распавёў біскуп Антоні Дзям’янка.

Чырвонай ніткай праз ватыканскі форум прайшла думка аб тым, што ў жыцці кожнага чалавека на планеце павінны быць тры рэчы: праца, жыллё, зямля.

Падзея і задумвалася як разважанне над гэтым патрабаваннем і над пытаннем, якімі інструментамі — духоўнымі, палітычнымі ці грамадскімі —дасягнуць гэтай мэты.

Беларуская рэдакцыя Ватыканскага радыё (IL)

Абноўлена 05.06.2017 13:37
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа