1 жніўня адбылося пахаванне арцыбіскупа Дамініка Грушоўскага, які быў
Апостальскім Нунцыем у Беларусі ў 1996-2001 гг. Пахаванне прайшло ў в.
Велька Мання ў Славакіі — роднай мясцовасці спачылага. Іерарх адышоў у
вечнасць 27 ліпеня ў Нітры (Славакія) ва ўзросце 90 гадоў.
Пахавальную цырымонію з удзелам многіх біскупаў, вялікай колькасці святароў і вернікаў узначаліў кардынал Юзаф Томко. Як прадстаўнік беларускага епіскапату ў ёй прыняў удзел біскуп Пінскі Антоні Дзям’янка, а таксама два святары з Беларусі.
Біскуп Антоні Дзям’янка выступіў са словам удзячнасці і памяці аб спачылым іерарху. Пінскі ардынарый узгадаў пра дабрыню, цярплівасць і супакой, якія ўносіў арцыбіскуп Дамінік Грушоўскі. Біскуп прыгадаў некаторыя заслугі спачылага для Касцёла ў Беларусі: падчас яго служэння ў нашай краіне беларускі епіскапат павялічыўся ў тры разы, узнікла новая дыяцэзія, былі абвешчаны 16 новых благаслаўлёных.
За ўсё гэта пінскі ардынарый падзякаваў ад імя беларускага епіскапату і ўсіх вернікаў нашай краіны, а таксама адзначыў яшчэ іншыя заслугі арцыбіскупа Грушоўскага.
(AG)
