5 чэрвеня ў парафіі Св. Станіслава, біскупа і мучаніка, у Вялікай Дамброве каля Высокага Мазавецкага (Польшча) адбыліся ўрачыстасці з нагоды залатога юбілею святарства а. Веслава Глэмбоцкага OFM Conv, які паходзіць з гэтай жа парафіі.
У 1989-2013 гг. айцец Веслаў Глэмбоцкі працаваў у Беларусі ў парафіях у Івянцы, Пяршаях, Камені, Цеснавой, а таксама выконваў функцыі суддзі касцёльнага трыбуналу Мінска-Магілёўскай архідыяцэзіі.
Святую Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч. Акрамя юбіляра ў ёй прынялі ўдзел а. Юзаф Макарчык, а. Томаш Лях, які 15 гадоў працаваў у Валожыне, кс. прэл. Андрэй Стэцкевіч, а. Лех Баханэк з Івянца, марыёлаг і дагматык а. праф. Цэлестын Напюркоўскі з Непакалянава.
Мітрапаліт Тадэвуш Кандрусевіч у гаміліі падзякаваў юбіляру за ахвярнае служэнне. Іерарх адзначыў, што ў цяжкія гады, калі не было святароў, а. Веслаў адзін з першых прыйшоў з дапамогай Касцёлу ў Беларусі.
Таксама, спасылаючыся на вучэнне св. Яна Паўла II, Мітрапаліт падкрэсліў, што пакліканне з’яўляецца Божай таямніцай і дарам пакліканаму і народу, да якога ён пасланы. Арцыпастыр дадаў, што такім дарам беларускім вернікам быў айцец Веслаў.
Напрыканцы Імшы вернікі цёпла павіншавалі юбіляра, свайго земляка. Ад імя беларускіх католікаў арцыбіскуп Тадэвуш Кандрусевіч уручыў яму абраз Божай Маці.
(DN)
Фота Марка Сенькоўскага
