14 верасня, у свята Узвышэння Святога Крыжа, у парафіі Узвышэння Святога Крыжа на Кальварыі ў Мінску адбылася адпустовая ўрачыстасць. Святую Імшу цэлебраваў дапаможны біскуп Мінска-Магілёўскай архідыяцэзіі Аляксандр Яшэўскі SDB, які наведаў гэтую парафію ўпершыню.
На пачатку Імшы біскуп асвяціў адноўлены галоўны алтар у касцёле.
У гаміліі іерарх адзначыў, што свята Узвышэння Святога Крыжа дапамагае кожнаму чалавеку ўзгадаць, «якой цаной ён быў збаўлены», «якое значэнне ў яго жыцці мае крыж», і «з большай любоўю туліць да свайго сэрца гэты знак збаўлення». Гэтае свята, па словах біскупа, «заахвочвае нас палюбіць гэты прыгожы знак, бо ён суправаджае нас праз усё жыццё — не толькі як бачны знак, але і як нябачны, які мы нясём, прымаючы цярпенні, клопаты, цяжкасці».
«Мы вельмі часта цураемся гэтага знаку, баімся прызнацца перад іншымі, што мы — Хрыстовыя», — заўважыў іерарх і заклікаў вернікаў «мужна вызнаваць знак крыжа ўсюды».
Біскуп назваў крыж месцам «найбольшага праяўлення славы Езуса», «бо толькі Бог мог з дрэва ганьбы зрабіць дрэва збаўлення, радасці і шчасця».
Кажучы пра тое, знакам чаго павінен стаць для вернікаў крыж, іерарх вылучыў тры словы: мудрасць, любоў і пакора. «Сёння ўсім нам трэба аднавіць веру ў крыж і любоў да крыжа», — падкрэсліў біскуп, звяртаючыся да ўдзельнікаў урачыстасці.
На заканчэнне Эўхарыстыі біскуп благаславіў крыжы і крыжыкі, якія па традыцыі прынеслі з сабой вернікі.
Пасля Імшы выступіў хор «Майскія квяты».
(AG)
