З нагоды 80-гадовага юбілею заслужанага іерарха арцыбіскупа эмэрыта Тадэвуша Кандрусевіча арцыбіскуп Юзаф Станеўскі, Мітрапаліт Мінска-Магілёўскі, кіруе дастойнаму юбіляру шчырыя віншаванні.
Ваша Эксцэленцыя, глыбокапаважаны ксёндз арцыбіскуп Тадэвуш!
Ад імя вернікаў, духавенства і пастыраў Каталіцкага Касцёла Беларусі, з падзякай Богу за дар жыцця і паклікання Вашай Эксцэленцыі, хачу выказаць Вам самыя цёплыя віншаванні з нагоды Вашага 80-годдзя.
Шаноўны дастойны Юбіляр! Сёння разам з Вамі мы вяртаемся духоўна «пад страху дома» ў Адэльск, дзе, як казаў некалі святы Ян Павел ІІ, «усё распачалося: жыццё, навука, пакліканне».
Адэльск, дзе малая радзіма, Гродна, дзе Вы рабілі першыя крокі ў дарослае жыццё з малітвай мамы аб святарскім пакліканні для сына, тагачасны Ленінград, дзе атрымалі адукацыю ў політэхнічным інстытуце, — паўсюль пакрысе выспявала Вашае жаданне служыць Богу. Пасля была духоўная семінарыя ў Коўне (Літва) з вандроўкай у філасофска-тэалагічнае навучанне, святарскае пасвячэнне і першая парафія святой Тэрэзы ў Вільні пры Вострай Браме. Пасля Друскенікі, пасля зноў Вільня. Затым францішканскі ўзгорак у Гродне з Маці Божай Анёльскай і падножжа Маці Божай Кангрэгацкай (так званай «Студэнцкай») у гродзенскай Фары. Потым гістарычны марыйны санктуарый у Гудагаі, дзе 25 ліпеня 1989 года прагучала «Habemus Episcopum!». 20 кастрычніка — біскупскае пасвячэнне ў Рыме з рук Святога Айца Яна Паўла ІІ. Спачатку служэнне ў Беларусі, затым з 13 сакавіка 1991 года — служэнне ў якасці Апостальскага адміністратара ў Маскве для католікаў лацінскага абраду еўрапейскай часткі Расіі.
Ваша Эксцэленцыя, «дзе нарадзіўся, там прыгадзіўся», кажа народнае выслоўе, — маю на ўвазе вяртанне Вашай Эксцэленцыі на Бацькаўшчыну, гэтым разам ужо згодна з рашэннем Папы Бэнэдыкта XVI.
Новае заданне — і новыя выклікі часу, бо сам Бог у гэты час выбраў Вас: Мітрапаліт Мінска-Магілёўскі, Апостальскі адміністратар Пінскай дыяцэзіі ad nutum Sanctæ Sedis, Старшыня Канферэнцыі Каталіцкіх Біскупаў у Беларусі, Старшыня камісій пры ККББ і многіх іншых структур Касцёла, але перадусім — хрысціянін, як вы самі часта падкрэсліваеце ў сваіх прамовах.
Ваша Эксцэленцыя, поўная сэрца і мудрасці Ваша праца была ацэненая шматлікімі касцёльнымі, дзяржаўнымі і недзяржаўнымі арганізацыямі: Вы з 1999 года — сапраўдны член Міжнароднай акадэміі навук Еўразіі, член спецыяльнай рады па Еўропе пры Генеральным сакратарыяце Сіноду Біскупаў, а таксама Папскай рады справядлівасці і спакою, віцэ-прэзідэнт Еўразійскага аддзялення Міжнароднай асацыяцыі рэлігійнай свабоды (МАРС).
Аднак найвялікшай узнагародай — у часовым вымярэнні — з’яўляецца пашана, сімпатыя і любоў вернікаў, якая выражаецца праз малітву, духоўную падтрымку, добрыя словы і апладысменты!
Ваша Эксцэленцыя, сёння разам з Вамі ахвяруем на алтары плёны 80-гадовага пілігрымавання.
Шаноўны і дарагі наш Юбіляр! Няхай Бог праз заступніцтва Найсвяцейшай Маці і Вашага заступніка святога Юды Тадэвуша, а таксама Міхала Арханёла благаслаўляе кожны дзень Вашага жыцця. Няхай адорыць Вас патрэбнымі дарамі ў верным служэнні Хрысту, у высакародным служэнні Касцёлу, Бацькаўшчыне і беларускаму народу, у служэнні кожнаму чалавеку, якога Божы Провід паставіць на дарозе Вашага жыцця.
Ваша Эксцэленцыя, арцыбіскуп Тадэвуш! Дзякуем Вам за прыклад крочання за Панам не толькі праз дасягненні і трыумфы, але і праз хваробу і цярпенне.
Plurimos annos!
