У суботу 7 снежня ў парафіі Беззаганнага Зачацця Найсвяцейшай Панны Марыі ў Крычаве, што на Магілеўшчыне, адзначылі адпустовую ўрачыстасць.
Акрамя мясцовых парафіянаў, у ёй узялі ўдзел вернікі з Касцюковічаў, Клімавічаў і Магілёва.
Цэлебрацыю ўрачыстай святой Імшы ўзначаліў Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB, адказны за Магілёўскі рэгіён. Разам з пастырам Эўхарыстыю канцэлебравалі дэкан Магілёўскі ксёндз Андрэй Кеўліч з Горак, ксёндз Ежы Вежхоўскі CMF з магілёўскай парафіі святога Антонія і ксёндз канонік Андрэй Далянскі з Касцюковічаў, які ажыццяўляе душпастырскую апеку над вернікамі ў Крычаве.
У прамоўленай гаміліі біскуп Яшэўскі на падставе біблійных тэкстаў з Літургіі слова растлумачыў вернікам праўду веры ў Беззаганнае Зачацце Панны Марыі, якая была і застаецца «поўнаю ласкі» (пар. Лк 1, 28).
Іерарх заахвоціў удзельнікаў урачыстасці браць прыклад з Марыі, каб так, як Яна, заўсёды прымаць Божую волю і жыць у Божай ласцы.
Адметнасцю парафіяльнага свята стала тое, што Імша адбывалася ў капліцы, дзе праходзіць капітальны рамонт. Сёння тут ужо зроблены новы дах, падшыта і ўцеплена столь, заліта бетонная падлога. Нягледзячы на тое, што яшчэ шмат працы і памяшканне капліцы не паспела прагрэцца, атмасфера малітвы была поўная цеплыні, узнёсласці і радасці.
Пасля Эўхарыстычнага стала ўдзельнікі ўрачыстасці сустрэліся на традыцыйнай хрысціянскай агапе — супольным пасілку, — каб разам папіць гарачай гарбаты і пачаставацца тым, што для гасцей прыгатавалі крычаўскія парафіяне.
Біскуп Яшэўскі і ксёндз Далянскі выказалі вялікую падзяку ахвярадаўцам і ўсім тым, хто ўзяў удзел у акцыі «Дар сэрца для Касцёла на Магілёўшчыне».
Пры гэтым ксёндз Андрэй адзначыў, што дзякуючы прыхільнасці да гэтай справы арцыбіскупа Юзафа Станеўскага, клопату біскупа Аляксандра Яшэўскага і шчодрасці ахвярадаўцаў крычаўскія католікі могуць працягваць рамонт сваёй святыні.
