Мітрапаліт Мінска-Магілёўскі арцыбіскуп Юзаф Станеўскі прызначыў новага пробашча парафіі Унебаўзяцця Найсвяцейшай Панны Марыі ў старадаўняй катэдры ў Магілёве.
Як было паведамлена 25 кастрычніка на сайце Мінска-Магілёўскай архідыяцэзіі, ім стаў ксёндз Уладзімір Русак, які быў вызвалены ад пасады пробашча парафіі Найсвяцейшага Сэрца Езуса ў Лебедзева (Мінска-Магілёўская архідыяцэзія, Маладзечанскі дэканат) і прызначаны пробашчам парафіі Унебаўзяцця Найсвяцейшай Панны Марыі ў Магілёве (Магілёўскі дэканат).
Літургічны абрад уступлення на пасаду новага пробашча адбудзецца ў нядзелю 27 кастрычніка ў 11.00.
Яго здзейсніць адказны за Магілёўскі рэгіён Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB.
Новапрызначаны пробашч ксёндз Уладзімір Русак звернецца да прысутных з праграмнай гаміліяй
Арцыбіскуп Станеўскі дзякуе біскупу Яшэўскаму за душпастырскую апеку над згаданай парафіяй у Магілёве і рамонты, праведзеныя пасля стыхіі, якая пашкодзіла дах касцёла. Арцыпастыр таксама запрашае да супольнай малітвы ўсіх ахвотных і просіць памаліцца аб святарскіх і манаскіх пакліканнях з сем’яў Мінска-Магілёўскай архідыяцэзіі.
