Раніцай 26 мая, на насутпны дзень пасля біскупскага пасвячэння, каад’ютар Гродзенскай дыяцэзіі Уладзімір Гуляй узначаліў цэлебрацыю нядзельнай святой Імшы ў парафіі Узвышэння Святога Крыжа ў Лідзе (Фара), дзе больш за 20 гадоў быў пробашчам.
Як адзначае Прэс-служба Гродзенскай дыяцэзіі, гэта была першая Эўхарыстыя, якую новапасвячаны іерарх цэлебраваў у якасці біскупа — своеасаблівая «прыміцыя».
Перад пачаткам Імшы біскупа пры ўваходзе ў касцёл сустрэлі святары, якія нясуць тут служэнне, а таксама парафіяне, міністранты, семінарысты, што паходзяць з гэтай парафіяльнай супольнасці — адной з самых вялікіх у нашай краіне.
Урачыстая літургія сабрала вялікую колькасць вернікаў. У ёй узялі ўдзел таксама святары і прадстаўнікі іншых парафій Ліды. Яны прыйшлі, каб падзяліць радасць за новага біскупа, які з’яўляецца біскупскім вікарыем Лідскага рэгіёна Гродзенскай дыяцэзіі.
Іерарх цэлебраваў Эўхарыстыю ў інтэнцыі парафіі, за ўсіх яе вернікаў і святароў.
Ксёндз Віталій Сідорка, пробашч лідскай парафіі святога Юзафа, рамесніка, і благаслаўлёных сясцёр, мучаніц з Навагрудка, прамовіў гамілію у якой пазнаёміў з сімволікай знакаў біскупскага служэння: мітры, пастарала, герба, а таксама падкрэсліў важнасць ролі біскупа ў супольнасці Касцёла і ў жыцці кожнага хрысціяніна.
Напрыканцы Імшы парафіяне, у тым ліку моладзь і дзеці, выказалі біскупу свае пажаданні і словы падзякі.
Іерарх, у сваю чаргу, падзякаваў вернікам за падтрымку, прысутнасць і малітву, падкрэсліўшы, што спіс тых, каму ён удзячны, вельмі вялікі і ўсіх не пералічыць, але ён заўсёды носіць іх у сэрцы.
