23 мая падчас пастырскай сустрэчы духавенства Мінска-Магілёўскай архідыяцэзіі ў Будславе Мітрапаліт Мінска-Магілёўскі арцыбіскуп Юзаф Станеўскі паведаміў, што па яго просьбе Папа Францішак надаў ганаровы тытул Капелана Яго Святасці ксяндзу каноніку Уладзіславу Завальнюку.
Дэкрэт аб прызначэнні на заканчэнне святой Імшы, якую ў будслаўскай базыліцы канцэлебравалі сабраныя на дзень засяроджання духоўныя асобы з усёй архідыяцэзіі, прачытаў на лацінскай мове арцыбіскуп эмэрыт Тадэвуш Кандрусевіч.
Наданне ганаровага тытула папскага прэлата аднаму з найстарэйшых святароў архідыяцэзіі, які 26 мая адзначыць 50-годдзе святарскага служэння, а 8 ліпеня будзе святкаваць 75-гадовы юбілей з дня нараджэння, з’яўляецца выразам прызнання вялікіх заслугаў ксяндза Уладзіслава перад Касцёлам.
Большая частка яго святарскага жыцця была прысвечана менавіта служэнню Касцёлу ў Беларусі, дзе руплівы душпастыр прычыніўся да адраджэння веры і адкрыцця многіх зачыненых у гады атэістычнага пераследу каталіцкіх святыняў.
Сімвалічна, што пра наданне яму высокай касцёльнай адзнакі было паведамлена менавіта ў Будславе, бо ксёндз Уладзіслаў Завальнюк найбольш паспрыяў развіццю культу Маці Божай Будслаўскай у агульнабеларускім маштабе, і яго намаганнямі штогадовы Будслаўскі фэст быў унесены ЮНЕСКА ў рэпрэзентацыйны спіс нематэрыяльнай культурнай спадчыны чалавецтва.
Да гэтага часу адзіным святаром у Мінска-Магілёўскай архідыяцэзіі, які меў тытул Капелана Яго Святасці, быў ксёндз прэлат Эдмунд Даўгіловіч-Навіцкі, пробашч парафіі святога Юзафа ў Маладзечне і дэкан Маладзечанскі.
