4 сакавіка у парафіі святога Казіміра і святой Ядзвігі ў Магілёве, дзе нясуць служэнне айцы дамінікане, адзначылі парафіяльную ўрачыстасць у гонар нябеснага апекуна супольнасці.
З гэтай нагоды ў маленькай капліцы, дзе моляцца парафіяне, сабралася каля 50-і чалавек. Цэлебрацыю адпустовай святой Імшы ўзначаліў Мітрапаліт Мінска-Магілёўскі арцыбіскуп Юзаф Станеўскі. Разам з арцыпастырам Эўхарыстыю цэлебравалі адказны за Магілёўскі рэгіён Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB, а таксама некалькі святароў з бліжэйшых парафій, грэка-каталіцкі святар і двое дамініканаў з Віцебска.
Пробашч парафіі айцец Раман Шульц OP прывітаў гасцей і папрасіў галоўнага цэлебранта скласці Найсвяцейшую Ахвяру за парафію, якая мае амбітны план рэканструкцыі будынка і мару пабудаваць у Магілёве санктуарый святой Ядзвігі. Пробашч таксама звярнуўся з просьбай аб малітве аб новых пакліканнях у ордэн дамініканаў.
У прамоўленай гаміліі арцыбіскуп Станеўскі звярнуў увагу на тэму настальгіі ў жыцці вернікаў, «калі мы, як апосталы, пытаемся ў Езуса: „Дзе жывеш?“ Адны жывуць мінулым: „Былі калісьці добрыя часы: саладзейшы цукар, бялейшы снег, макрэйшая вада“. Іншыя могуць адказаць, што яны жывуць у віры актыўнай дзейнасці. Святы Казімір адкажа, што жыве ў Пану Езусе.
Па прыкладу нашага апекуна святога Казіміра, усе мы пакліканыя жыць у Езусе, гэта значыць на зямлі Божай любові. Жыць у краіне Божай любові азначае адмовіцца ад настальгіі і празмернай актыўнасці, і гэта прывядзе да адкрыцця жыцця як дару, на які Богу адказваюць словам „дзякуй“», — сказаў арцыбіскуп.
Напрыканцы ўрачыстасці біскуп Яшэўскі выказаў падзяку арцыбіскупу Юзафу Станеўскаму за пастырскі клопат пра Магілёўскі рэгіён архідыяцэзіі, а таксама падзякаваў за малітву ў інтэнцыі дзяржаўных ўладаў, якія далі згоду на служэнне ў Магілёве некалькіх святароў з-за мяжы.
Пасля святой Імшы Вольга Хілько, каталіцкая верніца з Мінска, пад гітару праспявала некалькі песень уласнага сачынення, у якіх згадвалася духоўнасць святога Казіміра, Эўхарыстыя і Маці Божая.
Парафіяне падрыхтавалі шчодры пачастунак у зале святой Ядзвігі, дзе ўдзельнікі парафіяльнай урачыстасці сабраліся пры супольным стале і размаўлялі на розныя тэмы.
