18 студзеня намеснік старшыні Віцебскага аблвыканкама Вячаслаў Дурноў і член калегіі апарату Упаўнаважанага па справах рэлігій і нацыянальнасцяў Сяргей Фадзеенкаў павіншавалі біскупа Алега Буткевіча з 10-годдзем пастырскага служэння на чале Віцебскай дыяцэзіі.
Пра гэта паведамляе сайт абласной газеты «Витебские вести» vitvesti.by.
«Біскуп з тых людзей, хто хварэе сваёй справай, нягледзячы на цяжкасці і ахвяры, працуе дзеля дабра людзей, у тым ліку тых, якія трапілі ў складаныя жыццёвыя сітуацыі. Дапамагае словам і справай, каб яны маглі наблізіцца да Бога. Мы як прадстаўнікі мясцовай улады працуем у шчыльнай звязцы з Каталіцкім Касцёлам у сацыяльнай сферы, рэалізуем маштабныя праекты, якія спрыяюць умацаванню міру і ўзаемаразумення ў грамадстве, скіраваныя на падтрымку ўразлівых катэгорый грамадзян», — адзначыў Вячаслаў Дурноў.
Прадстаўнік улады перадаў біскупу Буткевічу віншаванні старшыні Віцебскага аблвыканкама Аляксандра Субоціна і старшыні Віцебскага абласнога Савета дэпутатаў Уладзіміра Цярэнцьева.
«Перада мной стаяла цяжкая задача: захаваць тое, што было зроблена да мяне і развіваць Касцёл далей. Дзякуй Богу, многае атрымалася: становіцца больш вернікаў, святынь. У сучасным жыцці шмат выклікаў і пагроз, трэба мець надзейны падмурак, каб ім супрацьстаяць. Таму ўпэўнены, што духоўныя хрысціянскія каштоўнасці як найлепш для гэтага падыходзяць», — сказаў біскуп Алег Буткевіч.
