Сустрэча супрацоўнікаў беларускай рэдакцыі «Радыё Марыя» з валанцёрамі
прайшла 25 лютага ў мінскім Чырвоным касцёле.
На працягу чатырох гадзін
актыўнага дыялогу ўдзельнікі, сярод якіх былі і аўтары будучых перадач,
дзяліліся сваімі ідэямі і бачаннем новых тэмаў у эфіры.
«”Радыё Марыя” — не проста радыё, гэта сапраўдная сям’я, якая працуе ў 80 краінах свету — адзначыў праграмны дырэктар беларускай рэдакцыі кс. Аляксандр Улас. — Тыя, хто будзе працаваць у нас, будзе дзяліцца сваім талентам з усімі. У цэнтры ж усяго будзе Марыя».
Эфір «Радыё РМ»: малітва, катэхеза, сацыяльныя тэмы
Доля музыкі ў вяшчанні «Радыё РМ» будзе найменшай у параўнанні з іншымі тэматычнымі блокамі радыё — малітвай, катэхезай і сацыяльнымі пытаннямі — і будзе складаць толькі 10 працэнтаў.
Паводле слоў каардынатара «Радыё РМ» Аліны Угорыч, найбольшая ўвага будзе ўдзяляцца малітве. Прычым не толькі малітве ў запісе, але і спантаннай малітве ў прамым эфіры.
Сярод перадач з’явіцца і адмысловая катэхеза для дзяцей. Па вечарах для самых маленькіх будуць рыхтавацца спецыяльныя казкі-малітвы — байкі на хрысціянскую тэматыку. Знойдзе сваё месца ў эфірнай сетцы і перадача, прысвечаная этыцы вядзення бізнесу.
Чытайце таксама:
Пра тое, якія яшчэ тэмы варта закранаць у працы рэдакцыі, супрацоўнікі «Радыё РМ» пацікавіліся ў валанцёраў.
Квест па старонках Бібліі? Чаму б і не!
Сярод тых, хто прыйшоў на сустрэчу, былі людзі самых розных узростаў.
Былому выкладчыку БДПУ імя М. Танка Здзіславу Бельскаму — 77 гадоў. Пра стварэнне ў Беларусі рэдакцыі «Радыё РМ» ён даведаўся дома — нехта з сям’і раздрукаваў інтэрнэт-старонку з інфармацыяй пра запуск «Радыё РМ».
«Я вельмі радуюся, калі бачу на лагатыпе радыёстанцыі выяву Марыі. Малюся, каб беларуская рэдакцыя “Радыё Марыя” працягвала развівацца ў Беларусі», — адзначыў Здзіслаў Бельскі (на фота — унізе).
Тэматыку будучых перадач валанцёры абмяркоўвалі ў групах, кожная з якіх працавала з пэўнай узроставай катэгорыяй. Удзельнікі разважалі над тым, якая тэматыка можа быць цікавай для слухачоў рознага ўзросту і якім чынам самі слухачы могуць прычыніцца да развіцця і папулярызацыі «Радыё РМ».
Сярод прапанаваных тэм — краязнаўчыя, песенныя, моладзевыя рубрыкі; заданні на веданне Святога Пісання («квест па старонках Бібліі»), анонсы пілігрымак, аповеды пра святароў і людзей, якія ў 1990-я распачыналі працу па аднаўленні рэлігійнага жыцця ў Беларусі, а таксама перадачы, прысвечаныя Бібліі, асаблівасцям літургічнай мовы, касцёльным рухам і да т.п.
На завяршэнне валанцёры паслухалі даклад па асновах журналістыкі, дзе даведаліся пра асаблівасці літургічнай тэрміналогіі ў беларускай мове і пачулі пра тыповыя памылкі ў маўленні радыёвядучых.
