7 кастрычніка кардынал Клаўдыё Гуджэроці, Прэфект Дыкастэрыі па справах Усходніх Касцёлаў, спецыяльны пасланнік Папы Льва XIV на ўрачыстасці з нагоды 100-годдзя Пінскай дыяцэзіі, які ў 2011-2015 гадах быў Апостальскім Нунцыем у Беларусі, святкуе дзень свайго 70-годдзя. З гэтай нагоды Старшыня Канферэнцыі Каталіцкіх Біскупаў Беларусі арцыбіскуп Юзаф Станеўскі ад імя ККББ кіруе яму словы віншавання.
Мінск, 7 кастрычніка 2025 г.
Яго Эмінэнцыі кардыналу Клаўдыё Гуджэроці
Прэфекту Дыкастэрыі па справах Усходніх Касцёлаў
Ваша Эмінэнцыя,
Ад імя Канферэнцыі Каталіцкіх Біскупаў Беларусі шчыра віншую Вас з 70-годдзем, дзякуючы Вам за нястомнае служэнне паўсюднаму Касцёлу.
Католікі Беларусі з цеплынёй успамінаюць Ваша служэнне як Апостальскага нунцыя ў нашай краіне, падчас якога Вы з мудрасцю, разважлівасцю і міласэрнасцю паказалі нам блізкасць Святога Айца і Святога Пасаду. Ваша прысутнасць умацавала шлях веры, экуменічнага дыялогу і еднасці паміж Касцёлам і іншымі хрысціянскімі супольнасцямі.
На цяперашняй пасадзе Прэфекта Дыкастэрыі па справах Усходніх Касцёлаў Вы працягваеце адыгрываць каштоўную ролю ў садзейнічанні ўзаемаразуменню, міру і супрацоўніцтву паміж рознымі хрысціянскімі традыцыямі, кампетэнтна і аддана ўносячы свой уклад у місію Касцёла.
У гэты асаблівы дзень мы, запэўніваючы Вас у малітве, просім Бога, каб Ён адарыў Вас здароўем, духоўнай моцаю і радасцю у Вашым служэнні, і жадаем Вам, каб Вашыя словы і Ваш прыклад і надалей заставаліся святлом для многіх.
З вялікай радасцю чакаем вашай прысутнасці ў Беларусі з нагоды святкавання стагоддзя Пінскай дыяцэзіі, падзеі, якая стане крыніцай ласкі і адноўленай еднасці для ўсіх нас.
Ad multos annos!
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў Беларусі
