8 кастрычніка ў Салігорску (Мінска-Магілёўская архідыяцэзія, Нясвіжскі дэканат) адзначылі адпустовую ўрачыстасць у гонар святога Францішка, апекуна тутэйшай каталіцкай парафіі.
У дзень парафіяльнага свята салігорскія вернікі мелі магчымасць маліцца перад спісамі найбольш шанаваных на нашых землях цудадзейных абразоў Найсвяцейшай Панны Марыі, якія за тыдзень да гэтага прыбылі ў іх святыню ў межах перэгрынацыі, што ўжо трэці год адбываецца па Беларусі і за мяжой.
На пачатку ўрачыстай святой Імшы пробашч парафіі ў Салігорску айцец Сабеслаў Тамала OFM ад імя ўсіх мясцовых вернікаў прывітаў ксяндза Станіслава Станеўскага CSsR, куратара і духоўнага кіраўніка перэгрынацыі спісаў цудадзейных абразоў Маці Божай, з вуснаў якога вернікі пачулі гамілію. У прамоўленым Божым слове святар засяродзіўся на жыцці і дзейнасці святога Францішка, адзначыўшы яго бязмежную любоў да Збаўцы і Яго Найсвяцейшай Маці.
У святочны дзень салігорскія парафіяне дзякавалі Богу, Найсвяцейшай Панне Марыі ў Яе цудадзейных выявах і святому Францішку, апекуну іх супольнасці, за ўсе атрыманые ласкі, за касцёл і за свайго пробашча, у якога, паводле іх словаў, «шчырае сэрца і залатыя рукі».
Сабраныя ў святыні вернікі выказалі падзяку ўсім святарам і людзям добрай волі, дзякуючы якім Маці Божая ў спісах цудадзейных абразоў вандруе па парафіях, а ў гэтую адпустовую ўрачыстасць завітала таксама ў Салігорск, каб выслухаць малітвы і прыйсці з матчынай дапамогай ва ўсіх клопатах і турботах, каб даць суцяшэнне і запаліць святло надзеі ў сэрцы кожнага верніка.
Літургія завяршылася Эухарыстычнай працэсіяй вакол святыні.
З нагоды парафіяльнага фэсту перад касцёлам быў арганізаваны святочны кірмаш, які стаў ужо добрай традыцыяй у парафіі.
На кірмашы можна было набыць рэлігійныя рэчы і смачную выпечку салігорскіх гаспадынь, а таксама згуляць у латарэю святога Францішка, якую заўсёды рыхтуе пробашч.
У латарэі з цікавасцю і задавальненнем бяруць удзел не толькі дзеці і моладзь парафіі, але і дарослыя.
