11 лістапада Міністэрства сувязі і інфарматызацыі Рэспублікі Беларусь выпускае ў абарачэнне паштовую марку «30-годдзе ўсталявання дыпламатычных адносін паміж Рэспублікай Беларусь і Святым Пасадам».
Як паведамляецца ў інфармацыйным лісце пошты Беларусі № 42 (971) ад 4 лістапада 2022 года, дызайн маркі распрацавала Святлана Цырулік. Друк афсетны, паўнаколерны. Папера мелаваная, гумаваная. Марка мае памеры 40х28 мм і зубчасты грабеньчык. У адным аркушы 6 (2х3) марак. Памер аркуша 102х122 мм. Наклад маркі 30 тыс.
У інфармацыйным лісце Белпошты адзначаецца, што дыпламатычныя адносіны паміж Рэспублікай Беларусь і Святым Пасадам былі ўсталяваныя 11 лістапада 1992 года шляхам падпісання ў Мінску сумеснага Пратакола.
Бакі ўсталявалі дыпламатычныя адносіны на ўзроўні пасольства з боку Рэспублікі Беларусь і Апостальскай нунцыятуры з боку Ватыкана.
Марка надрукавана ў РУП «Бабруйская ўзбуйненая тыпаграфія імя А.Ц.Непагодзіна».
Намінал маркі «Н» адпавядае тарыфу на перасылку міжнароднай простай пісьмовай карэспандэнцыі (лістоў, бандэроляў, дробных пакетаў) вагой да 20 г. уключна непрыярытэтнай.
У дзень выпуску паштовай маркі ў абарачэнне на паштамце Мінска будзе праводзіцца спецыяльнае гашэнне на канверце «Першы дзень».
Колер мастыкі чорны. Дызайн спецштэмпеля і канверта «Першы дзень» Святланы Цырулік.
Раней паведамлялася, што Нумізматычна-філатэлістычы аддзел Дзяржавы Ватыкан выпусціць у абарачэнне восем новых марак, прысвечаных розным падзеям з жыцця Касцёла. У серыі таксама ёсць марка, прысвечаная 30-годдзю ўсталявання дыпламатычных адносін паміж Рэспублікай Беларусь і Святым Пасадам наміналам 1,25 еўра.
Ватыканская марка будзе выпушчана ў абарачэнне 16 лістапада.
