31 кастрычніка, у апошні дзень ружанцовага месяца, копіі цудадзейных абразоў Маці Божай з Марыйных санктуарыяў Беларусі, якія перэгрынуюць па касцёлах краіны, прыбылі ў маладую мінскую парафію святога Лукі Евангеліста і святога Марціна.
Парафіяльная супольнасць урачыста сустрэла абразы каля гандлёвага цэнтра па вуліцы Ландара, дзе цяпер знаходзіца капліца.
Парафія з’явілася яшчэ ў 2007 годзе, і некаторы час святыя Імшы для яе вернікаў адбываліся ў Чырвоным касцёле. Цяпер арандуецца асобнае памяшканне, дзе і праходзяць рэгулярныя набажэнствы.
На працягу доўгага часу вырашаецца пытанне аб атрыманні дазволу на будаўніцтва святыні.
Духоўны кіраўнік перэгрынацыі абразоў, вікарый сталічнай парафіі святога Сымона і святой Алены ксёндз Станіслаў Станеўскі CSsR, які таксама з’яўляецца душпастырам маладой супольнасці, вітаючы нябесную Апякунку ў часовым месцы культу, зазначыў: «Яна прыходзіць да нас, каб разам з намі заносіць да Бога нашыя просьбы, услухоўвацца ў нашыя цяжкасці, патрэбы. Аднак таксама Яна як Маці Касцёла дае нам надзею, супакой, бо нясе нам самы вялікі дар — Езуса Хрыста».
Перад копіямі цудадзейных ікон парафіяне дзякавалі Багародзіцы за атрыманыя праз Яе ласкі і праз Яе заступніцтва маліліся ў інтэнцыі хутчэйшага аднаўлення набажэнстваў і парафіяльнага жыцця ў касцёле святога Сымона і святой Алены, дзверы якого ўжо другі месяц зачынены для вернікаў і святароў.
Не лічачы Чырвонага касцёла, які з’яўляецца ініцыятарам перэгрынацыі, маладая парафіяльная супольнасць святога Лукі Евангеліста і святога Марціна стала першай мінскай парафіяй, якая прыняла Маці Божую ў копіях цудадзейных абразоў.
Імша падзякі на развітанне з абразамі адбудзецца 3 лістапада ў 19.00 у капліцы парафіі святога Лукі Евангеліста і святога Марціна (гандлёвы цэнтр «Жывінка», вул. Ландара 36 А).
