У нядзелю 23 кастрычніка, у першую гадавіну кананічнага ўступлення на пасаду мітрапаліта Мінска-Магілёўскага арцыбіскуп Юзафа Станеўскага, іерарх цэлебраваў Імшу ў мінскім катэдральным касцёле Найсвяцейшага Імя Марыі.
Асаблівым элементам літургічнага адзення арцыбіскупа на гэтай Імшы стаў палій Мітрапаліта, які напярэдадні быў ускладзены на яго Апостальскім нунцыем арцыбіскупам Антэ Ёзіч.
Разам з арцыбіскупам гэтую Эўхарыстыю канцэлебраваў дэкан магілеўскі ксендз Андрэй Кеўліч, які завітаў у мінскую катэдральную парафію, каб прасіць мясцовых вернікаў аб малітоўнай, а таксама і матэрыяльнай дапамозе для касцёла на усходзе нашай архідыяцэзіі.
Таксама гэты дзень быў асаблівым для адной з сем’яў катэдральнай парафіі, якая прынесла сваё дзіця ў святыню, каб ахрысціць. Раздзяліўшы радасць гэтай падзеі з бацькамі і роднымі дзіцяці, арбцыбіскуп Станеўскі ўдзяліў малому сакрамэнт хросту.
Падчас святой Імшы арцыбіскуп маліўся за вернікаў усёй архідыяцэзіі, дзякаваў Богу за першую гадавіну служэння на Мінска-Магілёўскай катэдры, а таксама прасіў аб малітве за духавенства, кансэкраваных асоб і аб новых пакліканнях да святарскага і манаскага жыцця.
