12 ліпеня на цвінтары перад катэдральным касцёлам Езуса Міласэрнага ў Віцебску адбылося благсслаўленне фігуры Маці Божай.
Як паведамляе сайт часопіса «Ave Maria», устаноўленая адмыслова да дня ўспаміну Маці Божай Шкаплернай у атачэнні туяў і кветніка наўзбоч плябаніі, яна не толькі прыгожа ўпісалася ў відарыс касцёльнай тэрыторыі, але і стане цяпер тым месцам, дзе кожны зможа, не заходзячы нават у святыню, памаліцца да Маці Езуса ў патрэбнай інтэнцыі, скласці да Яе свае просьбы, падзякаваць за спагаду і зычлівасць.
Абрад благаслаўлення фігуры здзейсніў пасля нядзельнай святой Імшы пробашч парафіі Езуса Міласэрнага ксёндз Валерый Марціноўскі.
Займаліся ж падрыхтоўкаю пляцоўкі для ўсталявання і ўсталяваннем самі парафіяне. Асабліва вызначыліся ў гэтай высакароднай справе сужэнцы Іосіф і Ніна Антонавы. Наогул, як адзначыў старшыня парафіяльнае рады Пётр Глод, з’яўленне каля касцёла фігуры Маці Божай — падарунак парафіянаў самім сабе. Самі прынялі рашэнне аб набыцці ды ўсталяванні, самі яго і ажыццявілі.
Яшчэ адным падарункам вернікам парафіі да дня Маці Божай Шкаплернай стала хрысцільня. Яна была набыта за сродкі ахвярадаўцаў — дзвюх сужэнскіх пар: Таццяны і Дзмітрыя Образавых, а таксама Вольгі і Сяргея Белабровых. І хоць трое ўнукаў Таццяны і Дзмітрыя даўно ахрышчаныя, гэта перашкодаю для іх у справе такой дабрачыннасці, як і для Вольгі і Сяргея, не стала. Бо ў парафіі нямала моладзі, для якой такая важная рэч неаднойчы, мабыць, прыдасца. А за тых, дзякуючы каму яна тут з’явілася, удзячныя парафіяне шчыра памоляцца да Пана Бога аб неабходных ласках.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)