Дырэктар парталу Catholic.by ксёндз доктар Аляксандр Улас ад імя супрацоўнікаў рэдакцыі віншуе адказнага за СМІ у Канферэнцыі Каталіцкіх Біскупаў у Беларусі біскупа Юрыя Касабуцкага з 25-годдзем з дня прэзбітэрскага пасвячэння.
Ваша Эксцэленцыя,
25 гадоў таму праз ускладанне рук Сведкі веры кардынала Казіміра Свёнтка Вы прынялі вялікі «дар і таямніцу», якім з’яўляецца ўдзел у Хрыстовым святарстве. З таго моманту Вы нястомна абвяшчаеце Евангелле вуснамі і ўсім сваім святарскім жыццём.
Як старшыня Рады па сродках масавай камунікацыі ў беларускім каталіцкім епіскапаце, Вы клапоціцеся, каб евангелізацыйнае заданне Касцёла паспяхова рэалізоўвалася таксама праз каталіцкія СМІ.
У дзень срэбнага юбілею Вашага святарскага служэння мы, рэдакцыя парталу Catholic.by, жадаем Вам нязломнай моцы духа і цела для будаўніцтва Божага Валадарства любові і справядлівасці на нашай зямлі і для служэння Божаму народу ў паўнаце святарства.
З малітвай,
ксёндз доктар Аляксандр Улас,
дырэктар парталу Catholic.by
