У выдавецтвае Мінска-Магілёўскай архідыяцэзіі «Pro Christo» выйшла кніга маладога салезіянскага святара Артура Ляшнеўскага SDB «Ахопленыя надзеяй. Душпастырска-выхаваўчае служэнне салезіянаў у Беларусі ў 1921–1991 гадах».
У кнізе, якая выйшла ў свет да 100-гадовага юбілею прысутнасці салезіянаў на тэрыторыі сучаснай Беларусі, разглядаюцца гістарычныя і тэалагічныя праблемы душпастырскай і выхаваўчай дзейнасці Таварыства святога Францішка Сальскага на нашых землях у 1921–1991 гадах. Аўтар распавядае пра місіянерскае служэнне салезіянаў на працягу 70-гадовага перыяду, душпастырскую дзейнасць законнікаў, якія прынеслі новы стыль у перажыванне веры і выхаванне моладзі, а таксама далучыліся да адукацыйнай, культурнай, прамысловай і гаспадарчай дзейнасці ў Беларусі.
У выданні прадстаўлена дзейнасць салезіянскага таварыства на беларускіх зямлях падчас трох перыядаў — у міжваенны, ваенны і пасляваенны.
Аўтар сабраў ужо вядомыя даследаванні, дапаўняючы іх новай інфармацыяй і сведчаннямі. Сабраны ксяндзом Артурам матэрыял сведчыць пра значны ўнёсак салезіянскіх місіянераў у ваенны і пасляваенны перыяды ў справу ратавання і адраджэння каталіцкай веры ў краіне.
У працы рэканструявана палітычная і рэлігійная атмасфера, якая панавала на беларускіх землях у кожны з трох вышэйпералічаных перыядаў з мэтаю лепшага разумення асяроддзя, адносін мясцовага насельніцтва і ідэалогіі паасобных палітычных плыняў на гэтай тэрыторыі ў вызначаны прамежак часу. Новая кніга адлюстроўвае не толькі дзейнасць салезіянаў на тэрыторыі нашай краіны, але і гісторыю Касцёла ў разгледжаны перыяд. У працы сабраныя шматлікія дакументы і сведчанні пра мучаніцтва беларускага духавенства.
Набыць кнігу можна у салезіянскіх парафіях:
- Парафія св. Яна Хрысціцеля — Мінск (Серабранка)
- Парафія Маці Божай Успамогі Хрысціянаў — Бараўляны
- Парафія св. Міхала Арханёла — Смаргонь
- Парафія Унебаўзяцця Найсвяцейшай Панны Марыі — Дзятлава
- Парафія святых апосталаў Пятра і Паўла — Жупраны
