Пошук

18.08.2021 17:24   Тэкст: Кс. Андрэй Рылка / Фота: Мікола Новікаў / Catholic.by

17 жніўня ў парафіяльным касцёле святога Юрыя ў вёсцы Паланечка (Пінская дыяцэзія, Баранавіцкі дэканат) адбылася святая Імша з нагоды 35-й гадавіны трагічнай смерці ксяндза Ежы Росяка (1914–1986) — святара-пакутніка, шматгадовага душпастыра ў цяжкія часы атэістычнага пераследу на баранавіцкай і навагрудскай зямлі.

Памятная ўрачыстасць распачалася з супольнай малітвы мясцовых вернікаў, шматлікіх гасцей і святароў на чале з Пінскім біскупам Антоніем Дзям’янкам каля магілы ксяндза Ежы Росяка на вясковых могілках у Паланечцы.

Пастыр падзякаваў парафіянам за тое, што дбаюць пра памяць свайго былога пробашча, сведчаннем чаго з’яўляецца прыгожа аздобленая і старанна дагледжаная магіла, да якой не зарастае сцежка тых, хто прыходзіць сюды памаліцца.

Пасля супольнай малітвы на могілках адбылася святая Імша ў парафіяльным касцёле святога Юрыя. Цэлебрацыю ўзначаліў біскуп Антоні Дзям’янка. У прамоўленнай гаміліі іерарх засяродзіў увагу вернікаў на незвычайным і вельмі драматычным жыццёвым шляху святой памяці ксяндза Ежы Росяка.

На яго лёс выпала ліхалецце сусветных войнаў у першай палове ХХ стагоддзя, высылкі і канцлагеры, радасць падрыхтоўкі да святарства ў Пінскай духоўнай семінарыі і часы нялюдскага пераследу і Гулагу, драматычнасць пастырскага служэння ў часы камунізму і радасць служэння няскоранаму Касцёлу ў Беларусі.

Пасля заканчэння Эўхарыстыі сваімі ўспамінамі пра ксяндза Росяка падзяліліся некаторыя яго вучні-святары: пробашч парафіі Узвышэння Святога Крыжа ў Баранавічах ксёндз Валянцін Новак, пробашч парафіі святога Юзафа ў Валожыне ксёндз Генрых Акалатовіч, родны брат цяперашняга пробашча парафіі ў Паланечцы ксяндза Леанарда Акалатовіча, а таксама пробашч парафіі святога Казіміра ў Стоўбцах ксёндз канонік Ігар Лашук.

Словы асаблівай падзякі біскуп Дзям’янка скіраваў спадарыні Аліне Новікавай, выхаванцы ксяндза Ежы Росяка, якая разам з супрацоўнікамі выдавецтва Мінска-Магілёўскай архідыяцэзіі «Pro Christo» падрыхтавала адмысловую публікацыю пра жыццёвы шлях і сведчанне прыгожага святарскага служэння святой памяці ксяндза Ежы Росяка.

   

 

Абноўлена 18.08.2021 17:29
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа