3 чэрвеня, ва ўрачыстасць Найсвяцейшага Цела і Крыві Хрыста, біскуп Гродзенскі Аляксандр Кашкевіч цэлебраваў Эўхарыстыю ў катэдральнай базыліцы святога Францішка Ксавэрыя ў Гродне.
Як паведамляе Grodnensis.by, разам з пастырам Касцёла на Гродзеншчыне Імшу канцэлебравалі Генеральны вікарый Гродзенскай дыяцэзіі біскуп Юзаф Станеўскі і святары, якія служаць у катэдры, на чале з пробашчам катэдральнай парафіі ксяндзом канонікам Янам Кучынскім.
Сёлета з прычыны пандэміі каранавірусу на Эўхарыстыі прысутнічалі толькі мясцовыя парафіяне.
Звычайна ў ёй удзельнічалі вернікі ўсіх гродзенскіх парафій, якія потым выходзілі ў эўхарыстычнай працэсіі на вуліцы горада, каб даць сведчанне сваёй веры.
Гамілію прамовіў біскуп Юзаф Станеўскі. Іерарх разважаў у ёй над таямніцай прысутнасці Бога ў белай Гостыі, якая, як ён адзначыў, з’яўляецца «скарбам Касцёла», «сэрцам свету», «мэтай, да якой кожны чалавек, нават несвядома, імкнецца».
Па словах іерарха, перад гэтай таямніцай Бога, прысутнага ў Эўхарыстыі, «мы падаем на калені, каб змяніць рытм нашага жыцця, у якім углядаемся ўдалечыню з нашым планам і надзеяй». Генеральны вікарый дыяцэзіі падкрэсліў, што, калі чалавек прымае Цела Хрыста, то ўваходзіць з Ім у Камунію, спалучае сваё жыццё з Ягоным.
«Аб гэтым Езус добра ведаў, таму стаўся хлебам штодзённага спажывання, дзеля штодзённага станаўлення чалавечай святасці», — сказаў іерарх.
Біскуп дадаў, што «той, хто прагне пазнаць Езуса ў Камуніі рэцэптарамі смаку, застанецца насычаны толькі хлебам, а той, хто прымае Яго сэрцам, наталяе душу моцай Божай».
Пасля Імшы адбылася эўхарыстычная працэсія па касцёле. Яна спынялася каля чатырох алтароў, дзе вернікі дзякавалі Пану Богу за Яго прысутнасць у іх штодзённай рэчаіснасці, перапрашалі за грэх занядбання ў жыцці і прасілі аб моцы Яго благаслаўлення на далейшы шлях дарогамі веры.
