![](/3/images/news/2020/06/2020-06-10-Lwitek.jpg)
9 чэрвеня ў Чэнстахове (Польшча) на 87-м годзе жыцця адышоў у вечнасць ксёндз Леон Вітэк OMI, які доўгі час служыў пробашчам у парафіі Нараджэння Найсвяцейшай Панны Марыі ў Зарачанцы (Балі Касцёльнай) каля Гродна (Сапоцкінскі дэканат).
Святара ўспамінае інтэрнэт-партал Гродзенскай дыяцэзіі Grodnensis.by.
Леон Вітэк нарадзіўся 23 сакавіка 1934 г. у сям’і Станіслава і Саламеі Віткаў у Вялікапольскім ваяводстве непадалёк ад Кратошына. Прэзбітэрскае пасвячэнне прыняў 18 сакавіка 1962 г. з рук арцыбіскупа Антонія Бараняка ў законніцкай супольнасці Місіянераў аблатаў Марыі Беззаганнай. Пасля пасвячэння служыў у некалькіх парафіях у Польшчы.
У 1995 г. распачаў служэнне ў Беларусі. Да 2014 г. кс. Леон быў пробашчам парафіі Нараджэння Найсвяцейшай Панны Марыі ў Зарачанцы (Балі Касцёльнай) Сапоцкінскага дэканату.
Шмат гадоў руплівы святар кожную пятніцу служыў у канфесіянале студэнтам Вышэйшай духоўнай семінарыі ў Гродне.
Ксёндз Леон застаўся ў памяці вернікаў як уважлівы і міласэрны спаведнік, заўсёды гатовы дапамагчы вырашыць духоўныя праблемы, адданы пастыр, айцец з добрым сэрцам і нязгаснай усмешкай на твары.
Вечны супакой дай яму, Пане…