У кожную першую суботу месяца ў парафіі Маці Божай Бялыніцкай у Бялынічах цэлебруецца святая Імша ў інтэнцыі Беларусі, трансляцыя якой будзе весціся на «Радыё Марыя».
Пачатак святой Імшы ў 18.30. Пасля Эўхарыстыі, у 19.30, адбываецца малітва на ружанцы.
У суботу 4 красавіка святая Імша за Беларусь будзе цэлебравацца перадусім у інтэнцыі выбаўлення ад эпідэміі каранавірусу.
У Бялынічах, што непадалёк ад Магілёва, знаходзіўся адзін з найбольш вядомых на тэрыторыі нашай краіны Марыйных санктуарыеў і цудадзейны абраз Маці Божай Бялыніцкай, каранаваны папскімі каронамі 20 верасня 1761 года.
Хоць з часу Другой сусветнай вайны і да сённяшняга дня месцазнаходжанне святыні невядомае, культ Маці Божай Бялыніцкай, якая ўшаноўваецца як Каралева Беларусі, у нашыя дні адраджаецца. Канферэнцыя Каталіцкіх Біскупаў у Беларусі з дазволу Святога Пасаду дадала заклік «Каралева Беларусі» ў Ларэтанскую літанію.
Вернікі парафіі Маці Божай Бялыніцкай на чале са сваім пробашчам ксяндзом Юзафам Сярпейкам запрашаюць братоў і сясцёр далучацца да супольнай малітвы ў інтэнцыі духоўнага аднаўлення Беларусі і вяртання нашага народа да яго духоўных каранёў.
Маці Божая Бялыніцкая, Каралева Беларусі, маліся за нас!
