19 сакавіка, ва ўрачыстасць святога Юзафа, супольнасць Міждыяцэзіяльнай вышэйшай духоўнай семінарыі ў Гродне павіншавала свайго былога рэктара біскупа Юзафа Станеўскага, Генеральнага вікарыя Гродзенскай дыяцэзіі.
На ўрачыстай святой Імшы з гэтай нагоды, якую ў семінарыйнай капліцы цэлебраваў імяніннік, сабраліся семінарысты, выхаваўцы, а таксама адміністрацыя і навучэнцы тэалагічнага каледжа імя святога Казіміра ў Гродне і прадстаўнікі апостальскага руху «Маргарыткі».
Сваімі малітвамі ўдзельнікі Эўхарыстыі асаблівым чынам ахінулі біскупа Юзафа, а таксама эканома семінарыі ксяндза Валерыя Аброшку, які ва ўрачыстасць святога Юзафа адзначае дзень нараджэння.
У гэты дзень Касцёл моліцца за ўсіх мужчынаў, каб Бог праз заступніцтва святога апекуна, які з’яўляецца прыкладам сціплага і пакорнага жыцця, дапамагаў ім будаваць хрысціянскую супольнасць у духу сапраўднай любові, добразычлівасці і ўзаемападтрымкі па прыкладзе святога Юзафа ў еднасці з Езусам і Марыяй.
У гаміліі да прысутных звярнуўся прэфект Вышэйшай духоўнай семінарыі ксёндз Ян Раманоўскі. Выхаваўца падкрэсліў цноту пакоры і цярплівасці св. Юзафа.
«Хоць у Святым Пісанні няма словаў Апекуна Святой Сям’і, але відаць яго паводзіны, поўныя пакоры, сціпласці і даверу Божым абяцанням, што для хрысціянаў з’яўляецца добрым прыкладам і ўзорам, асабліва ў сённяшнія неспакойныя часы», — адзначыў святар.
Святкаванне завяршылася ўрачыстым снеданнем.
