20 снежня ў магілёўскай парафіі св. Антонія адбылася аплаткавая сустрэча біскупа Аляксандра Яшэўскага SDB, Біскупскага вікарыя для г. Магілёва і Магілёўскай вобласці, з малітоўнымі супольнасцямі «Легіён Марыі», «Жывы Ружанец» і «Маці ў малітве».
Сустрэча супала з другім днём адвэнтавых парафіяльных рэкалекцый, якія ў гэтым годзе праводзіць у парафіі ксёндз Міхал Бубен, пробашч мсціслаўскай парафіі Унебаўзяцця Найсвяцейшай Панны Марыі.
Сустрэча пачалася святой Імшой, цэлебрацыю якой узначаліў біскуп, а адвэнтавую навуку прамовіў рэкалекцыяніст.
У гаміліі кс. Міхал, узяўшы за аснову літургію слова гэтага дня, звярнуў увагу на важнасць слова ў жыцці кожнага верніка.
«Мы штодзённа, паўтараючы словы малітвы „Анёл Панскі“, вызнаём, што Слова сталася Целам і пасялілася між намі, аднак ці памятаем пра тое, што чалавек, створаны на Божае падабенства, павінен таксама і сваім словам сведчыць пра прыналежнасць да Бога? Чаму тады сучаснаму чалавеку так цяжка прыняць Божае слова і жыць ім, а шмат прасцей карыстацца праклёнамі і словамі нянавісці?» — разважаў рэкалекцыяніст.
Пасля Эўхарыстыі ў доме айцоў клярэтынаў адбылася аплаткавая сустрэча, падчас якой у сямейнай атмасферы біскуп Аляксандр благаславіў аплаткі і павіншаваў вернікаў з надыходзячымі святамі Божага Нараджэння.
Віншуючы, іерарх звярнуў увагу на важнасць малітвы Ружанца, дабрачыннай дзейнасці «Легіёну Марыі» і нястомнай малітвы маці за сваіх дзяцей.
Дзякуючы за актыўны ўдзел у жыцці Касцёла на Магілёўшчыне, біскуп заахвоціў трываць у малітве і несці дабрыню Бога патрабуючым.
Сустрэча скончылася пачастункам, падчас якога біскуп распавёў пра бягучыя справы Касцёла на Магілёўшчыне і папрасіў маліцца ў справе адраджэння санктуарыя Маці Божай ў Бялынічах і вырашэння тых цяжкасцяў з якімі сутыкаецца Касцёл у гэтым рэгіёне.
