12 верасня, ва ўспамін Найсвяцейшага Імя Марыі, у мінскім архікатэдральным касцёле адбудзецца парафіяльнае свята, аднаўленне сужэнскіх абяцанняў і цырымонія інаўгурацыі катэдральнага капітула.
Святая Імша пачнецца ў 18.30, яе ўзначаліць Мітрапаліт Мінска-Магілёўскі арцыбіскуп Тадэвуш Кандрусевіч.
Катэдральны капітул у Мінску ў гонар cвятога Арханёла Міхала і Маці Божай Будслаўскай быў заснаваны 14 студзеня 2017 года Кангрэгацыяй па справах Духавенства. Галоўнымі функцыямі капітула з’яўляецца ўдзел у найбольш урачыстых цэлебрацыях у катэдральным касцёле ў Мінску і ў іншых месцах архідыяцэзіі, арганізацыя ў катэдральным касцёле канферэнцый і сімпозіумаў, прысвечаных дакументам Святога Айца і Апостальскай Сталіцы, паглыбленне культу святога Арханёла Міхала і Маці Божай Будслаўскай, дапамога арцыбіскупу Мітрапаліту Мінска-Магілёўскаму, забеспячэнне вернікам магчымасці прыступаць да сакрамэнту пакаяння праз дзейнасць каноніка пенітэнцыярыя.
