4 красавіка Мітрапаліт Мінска-Магілёўскі арцыбіскуп Юзаф Станеўскі адзначыць 55-годдзе з дня нараджэння.
З гэтай нагоды іерарх узначаліць у гэты дзень цэлебрацыю святой Імшы падзякі ў катэдральным касцёле Найсвяцейшага Імя Марыі ў Мінску.
Запрашаючы ўсіх ахвотных далучыцца да супольнай малітвы, арцыбіскуп Станеўскі адзначыў, што яго дзень нараджэння часта выпадае ў перыяд Вялікга посту, а сёлета будзе адзначацца падчас актавы Пасхі — найбольш урачысты тыдзень у літургічным годзе, а таксама ў першы чацвер месяца — асаблівы дзень малітвы аб пакліканнях да святарства.
Пачатак святой Імшы а 12-й гадзіне. Пасля цэлебрацыі ў архікатэдры адбудзецца святочны канцэрт «Пасхальная містэрыя».
Прамая трансляцыя з мінскага архікатэдральнага касцёла даступная на партале Catholic.by.
